قیزین گؤز یاشلاری

+0 به یه ن

شهه­رین بؤیوك پاركیندا گزیردی. قوجا دئییلدیر، آنجاق قوجالیق سینیرلاریندا ایدی. كیشی یورغونلوغون آلسین دئیه، بیر یاشیل بویالی آغاج تختین اوستونده اوتورور، اینده كی قزئتی تختین اوستونه قویور، بالاجا بیر كیفین گؤن حلقه­سین قولوندان چیخاردیب قزئتین اوستونه قویدو. پاركین بو بؤلومونده گل-گئت لاپ آز ایدی. خییابانین ساغ طرفیندن بیر گنج اوغلان و بیر گنج قیز گلیردیلر. اوغلان ساده گئییم­لی، بوی- بوخونلو و یاراشیقلی، قیز ایسه عادی گئییم­لی. آزجا اتلی اولاراق، بیله­سینه گؤزل دئمك اولمازدیر. نه اؤیمه­لی ایدی، نه دؤیمه­لی. كیشی بیر باخیشدا بونلاری سوزوب باشین آشاغا سادلی. ایكی گنج كیشی­نین قاباغیندان اؤتور، بو ائنسیز خییابانین باشیندا یول لارین اَییر، گئنیش بیر چمن­ین آراسینداكی دار كئچید ایله گئدیر، اورتاداكی تك بیر سالخیم سؤیود آغاجی­نین آلتیندا قویولموش بیر صاف قایانین اوستونده یان- یانا اوتوردولار. قیز، اوزون اوغلاندان یانا دؤندردی. كیشی اوزاق اولدوغونا قیزین گؤز یاشلارینی گؤرموردو. آنجاق اوغلان الین اوزالدیب قیزین یاناغین سیلنده كیشی بیلدی قیز آغلاییر. اوغلان اَییلیر قیزین آلینیندان اؤپور، قیزین بی الینی ال­لری­نین ایچینه آلیب گتیریر دیزی­نین اوستونه قویور و اییلیب اؤپور. قیز، اوزونو، اوغلانا سازی دؤندرمیردی. ایكی- اوچ تئلی باش اؤرتوسونون آلتیندان اوغلان سیلن یاناغی­نین اوستونه دوشموشدور. بیر كلمه ده دانیشمیردیلار.

اوغلان یئریندن دورور، قیزین قاباغیندا چؤمبه­لیر، باشینی قیزین دیزلری­نین اوستونه قویوب نئچه دقیقه بئلنچی قالدی. قیزین هله اوره­گی یوموشانمامیشدیر. قیزین ظاهیری و باطینی، تام تسلیم حالتینده گؤروكوردو. آمما گؤز یاشلاری و اوغلاندان اوز دؤندرمگی بؤیوك سورغو اولاراق كیشی­نین ذئهنی­نی مشغول ائتمیشدیر: گؤره­سن قیز وریانی سویا وئرمیش پئشمانلیقدان آغلاییر؟ ان بؤیوك سرمایه­سی اولان، بیر داها تاپا بیلمه­یه­جك قیزلیغینی ایتیردیگی، غورورلو اووجلاردان دوشدوگو، گوناه دویغوسومو بیله­سین سیخیر؟ باشقا بیر قیزین آیغای آرایا گلمیش یوخسا؟ دئمك اولماز، اوغلان قیزین دده­سی وارینا كیسه تیكمیش، قیزی توولاییر بلكه؟ بو خییالدان كیشی­نین اوره­گی­نین هاواسی چیسگین اولدو. بلكه­ده قیز سئویر. بلكه ده شهوت اودونو سویوتماق اوچون هله­لیك هوس اوزره قیزی الده ساخلامیشدیر.

كیشی او قده­ر بو صحنه­یه دالمشیدیر كی بوتون دویغولاری او گنج­لره یؤنلمیش و چئوره­سیندن خبری یوخ ایدی. لاپدان گؤزو یانیندا اوتورموش بیر گنجه ساتاشدی كی الینی كیفه ساری اوزالتمیشدیر. تئز كیفی تختین اوستوندن گؤتورور، اوزون گنجه توتوب دئدی: سن زحمت چكمه اؤزوم گؤتوره­رم.

فولكلور وارلیغیمیز، علی ظفرخواه



radyo dinle