بو گون ایسته­ییرم بیر گوجلو و دویغولو شعر سیزلر اوچون یازام. بو شعر «معجز شبستری» جنابلاریندان دی و «ضیافت و فلاكت» آدلانیب. اوخیوب، باخیشلاریزی منه یازین!

اوخوردی مرثیه خوان من باخیردیم حیرتله

ووروردی باشه جماعت كمال شدتیله

 

رفیق قووزادی باشین دئدی: اییل آشاغا

دئدیم: نیه؟ دئدی: همرنگ اول جماعتیله

 

روا دگیل باخاسان خارجی كیمی خلقه

گرك ملول اولاسان سن ده بو مصیبتله

 

خلاصه مرثیه بیتدی، چكیلدی یا الله

گؤتوردیك ال طرف كبریایه ملتله

 

دوشندی سفره یره، خونچۀ پلو گلدی

قارینلار اولدی چراغان او دادلی نعمتله

 

یانیردی پینج او مجلسده، خلق ترلردی

ولیك قار یاغیردی ائشیكده شدتله

 

ییغیلدی سفره تمام اولدی مجلس عشرت

ایاغه دوردی جماعت یئریندن عزتله

 

عباسینی گؤتوره ن ائیله­دی خداحافظ

یولا سالیردی قوناقچی بیزی نزاكتله

 

فناریلر یاخیلیب كوچه چون ایشیقلاندی

دئدیم رفیقه باخ ایندی اویانه دقتله

 

باخیب نه گوردی، پریشان، بینوا بیر جمع

آیاق یالین، بدن عریان، دوروبلا ذلتله

 

نه رنگ واردی نه قان یوزلرینده دم بسته

باخیردی خلقه او بی نور گؤزلر حسرتله

 

دئدیم رفیقه گورورسن او طفل معصومی

دوداقلاری گوگه ریب جنگ ائدیر طبیعتله

 

او عورته نظر ائت اگله شیب بوز اوستونده

باشی آچیق، دوناجاق بو گئجه او حالتله

 

روا دگیل باخاسان خارجی كیمی اونا سن

عباوی سالمیاسان باشینا محبتله

 

جگر كباب ائدیجی حالدور، بو حال ای دوست

نئجه گئدیب یاتاجاقسان ائوینده راحتله

 

رفیق یومدی گؤزون، ترله­دی خجالتدن

باشین آشاغه سالیب گئچدی گئتدی سرعتله

 

دالینجا سسلدی معجز: رفیق دور، گئتمه

گرك كه تیتره یه سن سنده بو جماعتله

 

بو یاره لی باجیلار مرهم ایسته ییر سندن

هارا قویوب گئدیسن، خلقی مین جراحتله