+0 به یه ن
...، هر شئی بیردن بیره اولدو. كیم آغادا بیدن بیره اریییب قورتولدو. اؤزوده دور قیشن پوفه -پوفونده.
...، یئددی مرتبهلی بینانین سكگیزینجی مرتبهسینده ساعاتین زنگی چالیندی. كیم آغا یوخودان خورتلادی. تر-تلهسیك گئییندی. چانتاسی چیینینده ائودن چیخدی ...
...،آددیم لارینی ایری گؤتوردو. باشی آشاغای دایانمادان گئدیردی. ایشه یوبانمیشدی. قولونداكی ساعاتینا باخی. یاتمیشدی. عقربه لرین اوچوده بیر-بیری نین اوسته شئت دوشموشدو ... بیر ایك دؤنه ساعاتین اوستونه چالدی. ساعات دان سس چیخمادی ...
یانیندان كئچن لرین بیریندن ساعاتی سوروشدو ... جاواب ائشیتمه دی. داها دوغروسو ائشیدیلمه دی. بیر داها باشقاسیندان سوروشدو. او دا بایاق كینا تای ائشیتمه دی ...
...، غریبه ایش ایدی. نییه كیمسه اونا ساعاتی دئمیردی. یوبانماسین دئیه گون ده كی یولوندا قاچماغا باشلادی. ساعات قاباغینا چاتاندا دایاندی. بینانین ساعاتینا باخدی. عقربه لرین اوچوده اوست-اوسته شئت دوشموشدولر ...
...، دوروخدو؟ اوشونودو؟ شاشیندی؟ اؤزونه ده آیدن دئییلدی ... یوبانماسین دئیه ایش یئرینه دوغرو قاچدی ... هله ترپنمه دن دایاندیغی یئرده دایاندی. هایانا گئده جه یینده قالدی. دؤرد بیر یانا باخدی. دؤرد یول آیریمی نین اورتاسیندایدی ... اؤزونه اله آلدی. آیاق – آیاق اولدو. یانیندا دوران كیشی دن یولونو سورشوسون دئیه، :"آغا!..." سؤزوندن آردینی دانشانمادی. یانینداكی كیشی، دوردوعو یئرده دونموشدو. ال آتیب قولوندان سیلكه له دی. كیشی دن سس چیخمادی. كیشی، چتیر النده قارا باسیلیب دونموشدو.
...، كیم آغا پاپاغینی چیخارتدی. قارین قوشی باشی یاغماسینا باخمایاراق، كیم آغانین ایستی سی ایدی. یول گوتدیكجه ده داها آرتیق قیزیشیردی. باشینی قالدیریب آلنی نین ترینی سیلدی. شالی جوم-جولوتما سویا باسییلدی. ایل یول اولاراق گؤزلری بینالارا، تابلولارا، یازی لارا ساتیشدی ... كیم آغا دوروخموشدو!... بونو دویدو. آنجاق گؤزلرینه اینانمادی. بیر داها گؤزلرینی سیلیب باخدی ... "قارا باسدی" دئییلدیف گؤردوك لری گئرچك ایدی. بینالارین تیكینتی سی تامام عكسینه ایدی. باش لاری یئرده، آیاق لاری گؤیه قالدیریلمیشدی. ساعاتا گلدیكده بینانین آغزی آیریلمیشدی. تابلولار، اونو لاپ دوروخدوردو. باشی بوغلادی. یازی لاردان بیر حرف اولسون دا اوخویانمادی.
...، غریزه اوزره یول لارین بیرینی توتوب قاچدی. ساعاتی ایشلَمه سه یدی ده گئجیكمه سینی دویوردو. جانی قیزیشمیشدی. تره باسیلمیشدی. پالتوسو، گؤرده سینه آغیرلیق ائدیردی. پالتوسونون قول لاری اوزانیب توولانیردی. «تربییت» ین آغزیندا اوزوقویلو یئره قابلاندی. شالوارینین پاچالاری آیاق لاری آلتیندا قالمیشدی. باشماق لاری آیاغیندان چیخمشیدی ... یئردن قالخاندا پالتوسو بیله سینی باسمیشدی. پالتارلاری اونسوز یول یئریییردیلر. آنجاق كی پالتارلارین ایچینده كیمسه گؤرونموردو ...
...، شاشیردیشدی. چانتاسینی هاردا سالمیشدی ... پالتوسونون اَته یی یئرده سورونوردو ... ائله جه ده شالواری ... آیاق لاری گؤرسنمیردی ... جانی دَهشَته دولموش بیردن – بیره باغیردی. سسی ده چیخمادی. سسی قولاق لاریندا باتدی ... اوشوندو. دؤرد بیر یانینا فیرلانیب باخدی. قارالتی دان باشقا هئچ زاد گؤرموردو. یول دان كئچن لر اؤز ایش لرینده ایدیلر ... قاچا-قاچدایدیلار ... بیر آنلیق اولسا دا، كیم آقایا بیر گؤز قیرپیمی دا باخمیردیلار ...
...، كیم آغا دایاندیغی یئرده بوغلاییردی. اؤزوده نه تَهر!... اریییردی ... سویا گئدیردی ... كیم آغا ترپندیكجه جانیندان قالخان بوغ قاتیلاشیردی. گؤزلری نین اؤنونو چَملندیریردی ... بیر آن فیرلاندیغی یئرده گؤزلری هئچ بیر یانی گؤرمه دی ... ایرچه یه سالینیب باغیردی. "هارای، آی هارای! ..." قاچدی ... قاچدیقجا پالتارلاری یئرده سورونوب، ال آیاغینا دولاشیردی.
...، اركین قاباغینا یئتیشنده، قیچی قیچینا دولاشدی. بیرداها، بلكه ده همیشه لیك اوزو قویلو یئرده قابلاندی ... ییخیلدیغی یئرده بوغلاییردی ... پالتارلاری یئرده سریلیب اؤزو ده گؤردن ایتیب باتدی. یئرده آنجاق بیر جانلی نسنه ایشاریردی. آغزی آچیلیب یومولوردو. دال-دالا. بوغلاییردی. یاواش-یاواش بوغلاییب قورتولدو.
بوغون ایزی كسیلدی ... كیم آغادان، سلقه-سهمان لا یئره سریلمیش بیر دست پالتاردان باشقا هئچ زاد گؤرونمه دی ...
...، قار یاغیردی. اؤزوده قوش باشی ... خیاوان، باش-باشا ساعات دان قونقایا كیمی الی چتیرلی آدام لار باسیلی ایدی. چتیر ال لرینده قارا باسیلمیشدیلار. دایاندیغی یئرده دونموشدولار ...
...، قار یاغیردی. خیاوان دولوسو آدام لارین قارا باسیلمیش هئیكل لری آغاریب پار-پار پارلاییردی ...
تهران شرق اسلامی آزاد بیلیم یوردونون اؤیرنجی سل درگی سی
"چیراغ" دان
واله شیری
