آتا- بابا سؤزلرینین كؤكو منیم چوخ سئودیگیم مسئله لردن بیری دیر. اونا گؤره ده چالیشارام بو سؤزلرین كؤكون اؤرگه نیب و اونلاری گونده لیك حیاتیمدا ایشله دم. بورادا دا نئچه آتا بابا سؤزونون كؤكون سیزلری اوچون "بهروز ایمانی" جنابلارینین "آتالار سؤزونون كؤكو و منشأیی" كیتابیندان یازمیشام. اومارام سئورسیز.

بونا دا شوكور

(سودا بوغولان سامان چؤپوندن یاپیشار)

بیرگون بیریسی چایدان كئچنده، سئل اونو ووروی آپاریر، چایین درنلیینه، كیشی باتیر سویا، سونرا الینی آتیر بیر قورو چؤپدن یاپیشیر و آغاج قارشیق باتیر سویا. كیشی هر سویا باتیب، چیخاندا دئییر: «بونا دا شوكور»، «بونا دا شوكور». بیر آیری آدام چایین قیراغیندا یاخینلاشیب، گوله – گوله اوندان خبر آلیر: آی قارداش سنكی، باتیسان سویا، بوغولورسان بو نه شوكور نامه دیر كی، سن اوخویورسان. بو سؤزدن سونرا، كیشی گؤرور، بوغولاجاق، اؤگه دن اونا های چیخمایاجاقدیر، اونا گؤره اؤزونه دایاق وئریب، چیخیر قیراغا و او مسخره ائله ین كیشی یه دئییر: بونا دئییردیم ها «شوكور».

ایندی گؤردون، بیرده آتالار دئییب، سودا بوغولان سامان چؤپوندن ده یاپیشار.

قویونون یاخشی آدی وار

كئچی نین آدی دا دیلیمین اوجوندادی

نئچه یوز ایل لردن بری، بوردان باكی یا، باكیدان بورایا، آل – وئر و ایش دالینجا گئدنلرین سیی آز دئییلدی. خصوصاً باكیدا نفت تاپیلاندان سونرا، بوردان- اورا ایش دالینجا گئده ن آداملارین سایی گون – گوندن چوخالیردی.

نفتین و باشقا طبیعی ثروتین او اراضی لرده یئرلشمه سی روس لارین، عصرلر بویو ماراق دایره سیندن چیخمامیش دیر.

شوروی جكومتیندن قابلاقلاردادا، روس مدنیتی و دیلی بو اراضی لرده اؤز یئرینی محكم لندیرمه یه چالیشیردی. بو خصوصدا آرتیق دانیشماق فیكرینده دئییلیك. چونكی بی مثلین و ائل دئییمی نین كؤكو بو مسئله ایله باغلی دیر.

دئییر:

ساراب محالیندان بیر گنج اوغلان، ایش دالینجا، باكی یا گئدیر. بو اوغلان اورا گئتمه یینه گئدیر، آما تنبل لیكدن، بیر ایش باشا سالا بیلمیر. بیر نئچه ایلدن سونرا چاپارلار خبر گتیریرلر كی، آی فلانی موشتولوغوموزو وئر، اوغلون باكیدان گلیر.

كیشی بوتون قوهوم – اقربایا خبر وئریر كی اوغلانی قارشیلانسینلار. ائله ده اولور. اوغلانی، دب- دب الیه، شپ- شپ ایله ائوه گتیریرلر. قوناقلار چكیلیب گنده ندن سونرا، كیشی اوغلونو سئوالا چكیر و باكیدان نه قدر پول قازاندیغینی سوروشور.

اوغلان دئییر: آتا من هئچ نه قازانمادیم. آمما یاخشی روس دیلی اؤیره ندیم. كیشی سئونیر و دئییر كی، اولسون دیل اؤیره نمك او قدر ده آسان ایش دئییل. دئیه: اؤز ممنونیتینی بیلدیریر. آتا اوغلونا دئییر: چوخ یاخشی دئ گؤروم، روسلار دوه یه نه دئییرلر؟

اوغلان جاواب وئریر: آتا بیز او یئكه لیكده لرین اؤیره نمه دیك.

آتا: یاخشی سئرچه یه نه دئییرلر؟

اوغلان: او كیچیك لرینده اؤیره نه بیلمه میشیك.

دؤزوملو آتا ـیالانچینی آخیرا كیمی قووماق لازیمدی» دوشونه رك، اوغلوندان یئنه سوروشور:، یاخشی دئ گؤروم، روی دیلینده قویونلا، كئچی یه نه دئییرلر؟

اوغلان اوتانماز – اوتانماز جاواب وئریر:« قویونون یاخشی آدی وار، كئچی ده دیلیمی اوجوندادی» دئدیكده، كیشی آغاجی گؤتوروب اوغلانی سالیر چؤله و دئییر: هاردان گلیبسن گئت اورایا، منه بئله اوغول لازیم دئییل.