+0 به یه ن
گئتمهك ایستهییرسن،
بهانهسیز گئت،
اویاتما مورگولو خاطیرهلری.
سسین همن سسدیر،
باخیشین اؤگئی،
گئدیرسن،
سسین ده یاد اولسون باری ...
سن دنیز قوینونا توللانمیش چیچك،
اوستونه دالغالار آتیلاجاقدیر.
ساختا محبّتین
ساختا سندتك
نه واختسا اوستونده توتولاجاقدیر.
دؤشهنیب یوللارتك آیاقلارینا
سنه یالواردیممی ...
بو مومكون دئییل!
قویمارام قلبیم تك ووقاریم سینا
آلچالیب یاشاماق عؤمور-گون دئییل.
دئمیرم سن اوجا بیر داغسان، اَییل،
دئمیرم قالیبدیر علاجیم سنه.
نه سنده محبّت قارا پول دئییل،
نه من دیلنچییم اَ آچیم سنه ...
گئتمك ایسته ییرسن
او یول، او دا سن ...
بیر جوت گؤز باخاجاق آرخانجا سنین.
گئتدین می ...
نه واختسا دؤنمك ایستهسن
تیكانلی یاستیغا دؤنهجك یئرین.
گئتمك ایستهییرسن ...
نه دانیش، نه دین!
یوخ اول اوزاقلارتك دوماندا، چنده ...
نهییمی سئومیشدین؟
دئییه بیلمهدین،
ایندی یوز عیب گؤرورسن منده.
گئتمك ایستهییرسن،
بهانهسیز گئت،
اویاتما مورگولو خاطیرهلری.
سسین همن سسدیر،
باخیشین اؤگئی،
گئدیرسن،
سسین ده یاد اولسون باری ...
نصرت كسمنلی – هامیسی سئوگیدندیر ...