بیر گؤزل شعر "حسین منزوی" جنابلاریندان

آی بوتون حوسنوده لیلایه چكن ایلهامیم

منی مجنون كیمی صحرایه چكن ایلهامیم

آی منیم گؤزلریم ذاتینا معنا یارادان

روحومو شور تماشایه چكن ایلهامیم

آی قیزاران اؤپوشوندن، گولوشوندن دوداقین

باخیشیندان گؤزونه سایه چكن ایلهامیم

آی سنین دؤشلرین اوستونده چلیپا زولفون

منی تصلیب مسیحایه چكن ایلهامیم

آی اوزون گول كیمی باغلار یاخاسیندان چیخادان

منی بولبول كیمی غوغایه جكن ایلهامیم

كیپریگینده قلم آلمیش اله باطیل خطینی

گؤزلرین نرگس شهلایه چكن ایلهامیم

آی سوتول آلمالاری آدمی یولدان چیخادان

وسوسه وئرمه ده حوّایه چكن ایلهامیم

حسن و عصمت ده داشان، یوسف مصره یاراشان

عشق جرأت ده زلیخایه چكن ایلهامیم

آی منیم كؤنلومو بو ورطه ده، سینمیش گمی نی

بیرده باشدان دلی دریایه چكن ایلهامیم

نازیلن قول و غزل ساحیری، اوز شاعیرینی

گینه ده شعر تمنّایه چكن ایلهامیم

آی پوزولموش كلماتی بو غزل ده تزه دن

اینجی تك ریشه نی معنایه چكن ایلهامیم