ارك قالاسی - یئنی بیر ایلده اوشاقلار اوخوللارا، مدرسه­لره گئده جك لر. ایلك دؤنه بالاجا آددیملارینی اوخوللارا قویان اوشاقلاریمیزی گودوب، گؤزله­ین­لر وار.

اونلار آتا، آنالاری كیمی اولمامالیدیلار. آتا آنالاری دا اوشلاقلیقدا بابالاری كیمی اولماماغا چاغیریلمیشدیلار. اونلارلا آتا آنا­لارینین اوشاقاقلیق­لاری آراسیندا بیر اؤنملی فرق واردیر: ایندی كی بالاجا اوشاقلار حتی ایللرجه مدرسه­یه گئتمه­میشدن اؤنجه مئدیا واسیطه­سی ایله بیلمه­دیگی بیر پروسه یه قوناقلانیب­لار.

بئله بیر سیستماتیك و غئیر­سیستماتیك اؤیرتیم پروسه­لرینده اینسانلار اولدوغو كیمی یوخ سیستم صلاح گؤردویو كیمی بیچیم­لنمه­لیدیر. دوغرو تصویر بودور: اوشاقلاریمیز غئیرعادلانه بیر ساواش مئیدانیندا اون سیرالاردا دورورلار.

اوشاقلار دونیانین هر یئرینده هر بیر سیاسی یا نیظامی چاتیشما­دا قورونمالیدیرلار. بئله اولمادیغی زامان بیز اونلاری مئیداندا بوراخمالیییق می؟ اونلارین اوشاق اللریندن بیر ایش گلمه­دیی زامان بیز نه ائتمه لییك؟ بو بیر سیاسی ایجتماعی ساواشین صحنه­لریندن بیریسی اولورسا بیز نئجه اؤزوموز و اوشاقلاریمیزدان مودافیعه ائتمه لییك؟

بئله بیر مئیداندا ایكی توتوم گوتوره بیلریك:

1- آسیملاسیون پروژه سینین تام قارشیسیندا دوروب گوتورولمه سینه مباریزه وئرمك.

2- پروژه­نی عقیم قویمایا چالیشماق.

بیرینجی توتوم هر زامان ثابیت اولاراق میللی حركتین ایستك لری ایچینده یئر آلمالیدیر. ایندیكی دورومدا ایكینجی توتوم شعارلار و تبلیغ­لردن یانا داها آرتیق عملیاتی نظره گلیر. یعنی هله­لیك بیز مسئله نی بوتؤلوك­له حل ائده­بیلمه­دیگیمیز زامان آسیمیلاسیون كوره سینی اثرسیز ائتمه­یه چالیشمالییق. بو ایشی باجاریرساق، پارس راسیسمی پلانلادیغی جینایتدن ایسته­دیی نتیجه­لری آلمادیغی زامان دالی اوتورماغی صلاح گؤره­جك. بو توتومون منطقی بئله دیر كی بیر سیستمی قیسا مودت­ده پوزا بیلمه­دینیز زامان اونون ایشلولرینی (كاركردلرینی) هدف آلین. بو هدفی عملیاتی ائتمك اوچون آشاغیداكی ایشلری گؤره بیلریك:

- مدرسه­لرین آچیلماسی و یا آنادیلی گونونو یالنیز آنا دیلیمیزه مرثیه اوخوماق موناسیبت­لری كیمی یارارلانمامالیییق. طبیعی بئله موناسیبت­لرده اؤز دیلیمیز و توپلوموموزون سورونلارینی اوجا سسله قولاقلارا چاتدیر مالییق باخمایاراق كی بیر چوخ قولاقلار بوندان اونجه بئله بیر سسلری ائشدیب اما ائشیتمه­میش كیمی یوللارینا دوام ائدیب­لر.

- ایلك اونجه "آنا دیلیمی باجاریرام می؟" جمله سینی اؤزوموزدن سورمالیییق. هر حالدا هر جور چتینلیك یا بهانه­لر اولورسا اوزوموزو هر یاشیمیزدا اولورساق بیرینجی عملی آددیم كیمی آنا دیلیمیزی اؤیرنمك­ده سوروملو بیلمه­لیییك.

- آنا دیلیمیزی كیمسه­دن دیلنمه­مه­لییك. حكومت گرك بو نتیجه­یه چاتسین كی رسمی اؤیرتیم سیستئمینده بیزیم دیلیمیزه ایمكان آچماسا دا، میللتیمیز اؤزو كؤنوللو اولاراق آنادیلینی غئیر رسمی یوللاردان اؤیرنه بیلیر.

- اوشاقلاریمیزا رسمی حكومت سیستمیندن ائشیكده عائیله­لر ایچینده اویرتیم شرایطی یاراتمالیییق.

- اولدوقجا توركجه غئیر رسمی اؤیرتیم آراجلارینی داها آرتیق كیفیت­له یارادیب اونلاردان یارارلانمایا چالیشمالیییق. بو آراجلار ایچینده اویدو كاناللارینین اؤنملی یئری واردیر.

-سمبولیك تحریمی حركت­لری تبلیغ ائدیب آسیملاسیون پروژه سیندن ترسینه اویانیش بیر فورصتی كیمی یارارلانمالیییق. بو ایش پروژه دن یارار قازانما یئرینه پارس راسیسمینه ضرر یئتیره بیلر.

سایدیغیمز تاكتیك لر اصلا بیر میللی موباریزه ده هزینه لی حركت تانینمیرلار. هر نه دن آیدین دیر كی بو ایشلر ان كیچیك و هزینه سیز ایشلردیر و میللی آزادلیق ایسته ین بیر میللت بوندان بؤیوك فداكارلیك لارا حاضیر اولمالیدیر.

اوخوللار و بیلیم یوردلار ایشه باشلادیغی زامان، آذربایجانین میللی حركتیده یئنی­دن آیاغا قالخمالی و یئنی بیر جان آلمالیدیر. فاشیستی سیاستلری قارشیسندا دایانماق هر آذربایجانلی­نین ایلك گؤره­ویدیر. آذربایجانین ایچینده بیرلیك یاراتماق و میللی حركتین فعاللارین میللته یاخینلاشدیرماق داها اؤنملی و ده­یرلی ایشله­ردیلر كی آذربایجانین چئشیتلی پارتیالاری و گروپلاری نظرده آلمالیدیرلار.

اؤیرنجی سیته­سی آذربایجانین توم فعاللارین و آذربایجانین شرفلی و غئیرتلی میللتین بیر بؤیوك چاغیریشا دعوت ائدیر . اؤیرنجی سیته­سی آذربایجان میللتیندن ایسته ییر تا یئنی بیر باشلانیشدا اورمو گؤلونو قوروماق اوچون و آذربایجانین اونودولموش حاقلارین دیریتمك اوچون توم تلاشلارینی ائلیییب و گلن آیلاردا بو اوچ مسئله­نی اؤز فعاللیت­لرین بیرینجی سیراسیندا یئرلشدیرسینلر.

1-  آنا دیلینده مدرسه (توركو دیلی رسمی اولسون).

2-  اورمو گؤلون قوروماق و اونون هارایینا سس وئرمك.

3- زیندانلاردا اولان میللی فعاللارین قورتولوشونا چالیشماق.

گله­جك بیزیمدیر!