+0 به یه ن
+0 به یه ن
شاطیر اوغلان، گؤروم آللاه سنه وئرسین بركت
قوی اونون یاخشی النسین، خمیرین اللنسین
چوخ پیشیر، یاخشی پیشیر، گؤیده فیریلدات كورهگی
منبر اوسته چؤرهگین قوی قالانیب تللنسین
تندیرون طور تكین، عرشدن آلسین ایشیقی
ارسینون بیرق احرار تكین میللنسین
كاسیبین قیسمتی یوخ، یاغلی پیلو دوشلهماغا
بو یاوان سنگكی بیر قوی ساحالیب سئللنسین
غئیرتین قوربانی، سن موشترینی تئز یولا سال
ائل ایچینده یاراماز آرواد – اوشاق وئللنسین
قوی ایكیریاللیغی ساتسین خوزهیین بیر ماناتا
دیشی دوشموش قوجانین آغزی نهدیر دیللنسین؟
او، منیم شعریمه چوخ ماییل اولان وردسته
دئینه: شاعیر چؤرهگی قوی قوروسیون، گللنسین
من لیغیرسا یئیه بیلسمده، فلوس لازیم اولار
بو سوسوز باغچا نه لازیم بو قدر بئللنسین؟
ساری یازلیقدان اولان گوللی، قیزارمیش سنگك
گرك آغزوندا اریك تك ازیلیب، هللنسین
تهرانین غئیرتی یوخ « شهریاری » ساخلاماغا
قاچمیشام تبریزه، قوی یاخشی – یامان بللنسین
باخچامیز فاسید اولوب، هر گولی اكرسن آچماز
یئری داشلیقدی، گرك توپراغی غربیللنسین
مدعاسی چوخ اولان، طبل تهی پر بادوخ
نئیلهیك، ضیرناچینین بورنی گرك یئللنسین
بو گیجللنمهدن، آی چرخ فلك، سن ده یورول!
بو حیاسیز گونه گؤزلر نه قدر زیللنسین؟
« سعدی » نین باغ گلستانی گرك حشره قدهر
آلماسی سلله له نیب، خورماسی زنبیللنسین
لعنت او باد خزانه، كی « نیظامی » باغینین
بیر یاوا گولبسرین قویمادی كاكللنسین
آرزو جولگه لرینده، بیز اكن مزرعهلر
دئیه سن ساقه لنیب، قوی هله سونبوللنسین
قیصصه چوخ، قافیه یوخ، آختاریرام تاپمیورام
یئریدیر « شهریار » ین طبعیده تنبللنسین
تبریز – تیر ماه 37
�