" آلبرت " اونون ان بؤیوك قارداش نوه سی دئدی :" او یئریییب گلدی ، قاپی یا یئتیشركن ماشینی ساخلادیب ، بیر آز یول یئریمه یینی سؤیله دی ."

-         " قولاق آس ، من ایكی ایلدیر ، یورقان – دؤشه ییمدن ائشییه چیخمامیشام . اونلار منی ماشینا دوشوردوب ، میندیریبلر . بئله دوشونوردوم كی داها بیرده آیاقلاریم اوسته یول یئریمه یه جم ، آمما چینارلاری گؤرر – گؤرمز ، دوشوندوم كی باشارا بیلرم. من بو یولدان دوز اللی – ایكی ایل اؤنجه ، بورادان قاچاركن ، كئچمیشم آمما ایندی یئنه قاییدیرام ."

" میدووز " خانیم دئدی :" من بونا سفئه لیك دئییرم ."

-         " آمما منی چوخ سئویندیردی . ایندی اؤزومو اون ایل اؤنجه دن چوخ گوجلی و ساغلام حیس ائدیرم. ائمیلی من هله یاشاییرام ."

آنا دئدی :" بئله ده اؤزونه گوونمه ".

ائله سانیردیم كی بیر نسلدیر ، كیمسه " میدووز " خانیمی " ائمیلی سسله مه ییب . قوجا كیشینین بئله راحاتجا دانیشماسی منی آزجا دوشوندوردو . آنا پارلاق باخیشلاریلا اونا باخیردی . اودا دیشسیز آغیزیلا شیرین – شیرین گولركن ، اونونلا میرت ووروردو . اونلارا باخماق چوخ غریبه ایدی . بو ایكی قوجا آدام بیر – بیرینی دوز یاریم قرن ایدی گؤرمه میشدیلر . بو فیكیر ده چوخ غریبه ایدی ، بو اوزون زاماندا كیشی اونو سئوركن اودا باشقا بیریسینی سئویردی . دوشونوردوم ، گؤره سن اونلار كوچمیشلرینی ، بیر – بیرینه دئدیكلرینی خاطیرلاییردیلار ؟ چوخ فیكره دالمیشدیم ، ایندی بونلار چوخ غریبه گؤرونوردولر ، آخی او كیشی ، قوجا آروادداناؤترو آتا ائوینی ، یاسا اؤزه اونا عایید اولان میراثینی بوراخیب ، تبعیدده یاشامیشدی . من سوروشدوم :

-         " كاپیتان میدووز سیز ائولنمیسینیز ؟ "

تیتره ین سسله دئدی :" یوخ بابام ."

سونرا قهقهه چكیب گولدو :" چون من خانیملاری یاخشی تانییرام ."

" میدووز " خانیم دئدی :" دئییرسن ده ، دوغرو دئسه یدین اوندا من چینین یاریم دوجون قارا آروادلارینی گؤرنده بوینوز چیخارتمازدیم !"

-         " چینلی لر قارا دئییل لر ائمیلی ، سن كی گرك یاخشی بولرسن اونلار ساری دریلی دیلر ."

-         " بلكه ائله اونا گؤره سن ده سارالمیسان . سنی گؤركن اؤز – اؤزومه دئدیم ، ائله بیل بو ساریلیق توتوب ."

-         " من دئمیشدیم كی ، سندن باشقا كیمسه ایله ائولنمه یه جم و ائولنمه میشم ده ."

او ائله دئمه دی كی ، اونا یازیقلیغیمیز گلسین یادا راحاتسیز اولاق ، آنجاق بو گئرچك ایدی و كیشی كیمی یئنه دئدی :

-         دئمیشدیم ایگیرمی مایل آیاقلاریم اوستونده یئرییه جه یم و یئریدیم ده ." دانیشیغیندان كدر دویولوردو . آنا دئدی :" بلكه ائولنسه یدین ایندی پئشمان اولموشدون ."

من بیر آز قوجا كیشی ایله چیندن دانیشدیم .

-         " چینده اووجومون ایچی كیمی تانیمادیغیم لیمان قالماییب . من آیاق چاتان هر یئره گئتمیشم . من ائلیه بیلرم آلتی گئجه – گوندوز سنی بوردا ساخلایام و گؤردوكلریمدن سنه دئیم ، یئنه ده گؤردوكلریمین یاریسی دئمه میش قالار ."

" میدووز " خانیم گؤزلرینده كی شوخلوقچو آنجاق مئهربان گولوشویله باخیب دئدی :" آمما جورج بئله كی گؤرورم ، بیر شئی اله گتیرنمه میسن ."

-         " من پول ییغانلاردان دئییلم . ایشله سونرا خرج ائله ، بو منیم اریودومدور . آمما اؤزومه بیر سئی دئیه بیلرم ، بیرده حیاتا درنه بیلسم ، یئنه اونو یاشارام . چوخ آداملار بئله دئمزلر ."

دئدیم " دوز بویورورسونوز ."

اونا ائحتراملا باخیردیم . او بیر دیشسیز ، فلج و پولسوز قوجایدی . آنجاق یاخشی یاشامیشدی ، چون یاشاییشیندان كئف ائله میشدی . اوردان ائوه دؤننده كیشی اوز چئویریب منه دئدی :" صاباح گل !." من چینی سئویردیمسه او ایستدیكلریمی منه سؤیه یه بیلردی .

صاباح اورا گئدیب و بیر آز چینه گؤره اونونلار دنیشدیم . چینارلارین اورتاسینداكی خیابانی آددیملایاركن آشاغی گئتدیم ، باخچایا یئتر – یئتمز " میدووز " خانیم گؤزومه دیدی ، گول دریردی ، اونا " سحرینیز خئیر " دئدیم ، باشینی قالدیردی ، بیر قوجاق آغ گول درمیشدی.

گؤز آلتی ائوه باخدیم و پرده لرین سالینیقلی اولدوغونو گرردوم ، دوشوندوم كی " میدووز " خانیم گونشین ایشیغین چوخ سئور اونا گرره همیشه دئیردی : -" سنی تورپاغا تاپشیراندان سونرا یئترلی زامانین اولاجاق قارانلیقدا یاشایاسان ."

سوروشدوم :" كاپیتان میدووز نئجه دیر ؟"

دئدی :" همیشه وحشی نین بیری ایدی. سحر چاغی " لیزی " اونا چای آپاراندا اؤلوسئیله اوزلشیب ."

-         " اؤلوسو ؟"

-         " بلی یوخودا اؤلوب . بو گوللری اونون اوتاغی اوچون دریرم . یاخشی سئوینیرم ، او قدیم ائویمیزده اؤلدو . " میدووز " لارا بو چوخ اؤنملی دیر ."

دونن گئجه چوخ چالیشمیشدیلار اونا قاندیرسینلار كی یورقان – درشه یینه گیریب یاتسین ، گئجه سورگونلوك حیاتیندا ، باشینا گلنلرین هامیسیندان بیر آز دانیشمیشدی . سئوینیردی كی بیرده او اسكی ائوه قاییدیب . خیاباندان ، ائوه قدر یاردیمسیز گلمه یینه گؤره چوخ ارزونه اؤیونوردو . یئكه – یئكه دانیشیب دئییردی كی هله ایگیرمی ایل ده یشایاجاق . آمما آلنینی یازیسی اونو چوخ سئویردی ، اؤلوم قلمینی ان گرزل نقطه یه قویموشدو . " میدووز " خانیم قوجاغینداكی گوللری ایله ییب سونرا دئدی :" سئوینیرم او قاییتدی ، من تاملا ائولندیكدن سونرا ، جورجون گئتدییینه گؤره ، دوغرودان دا هئچ زامان اینانمازدیم ، ایسته دیییم آداملا ائلنمیشم ."

" ساواش " كیتابیندان

چئویرن : " رضا حسینی بقانام "

 حاضیرلایانی :" سعید موغانلی "

یایینلایان : " یاشماق " درگی سی