بیر گؤزل نوحه « حضرت فاطمه » رساسیندا . یادیزدان چیخماسین سونونا قدر اوخویون .

قاپیسین كیم آچا زهرا آدینا ، وورولار مهر تبرّی آدینا

كیم عزاسینده گله سینه وورا ، خیر مقدم اونا مهدی بویورا

دؤیمه بی مایه دییرمان قاپیسین ، باقلاماز فاطمه احسان قاپیسین

خانیمین سفره ی گسترده سی وار ، عالم اوندان پای آلیر لئیل و نهار

دربدر گئتمه ، گل احسان ورینه ، سنی مئهمان ائله سین كوثرینه

شرطی وار پاس ادب ساخلیا سن ، دیلده پیمان وفا باغلیا سن

اولسا زهرایه كیمین معرفتی ، گؤز یاشی ایله یویولار معصیتی

یوخدی بوینوندا اگر حق الناس ، خانیمین دؤی قاپی سین ائتمه هراس

یا آدین نوكر زهرا قویما ، یا بو استفرقی گئیسن سویما

مدرك مستدل ایستر زهرا ، نوكریندن عمل ایستر زهرا

فاطمه نوكری غیبت ائله مز ، حق مظلومه خیانت ائله مز

فاطمه نوكری آزاده گزر ، پاك اولار راه تولّی ده گزر

فاطمه نوكری مغرور اولماز ، بو ائله وصله ناجور اولماز

فاطمه نوكری سؤز یاوه دئمز ، شبهه لی لقمه نی هر یئرده یئمز

فاطمه نوكری عزت قازانار ، بو گدا لیقدا شرافت قازانار

فاطمه نوكری آتماز شرفین ، تانیر اولده علی نین هدفین

فاطمه نوكری عیاش اولماز ، ائوی موسیقی سسی ایله دولماز

قولاق آس بیر سسه بوشلا هوسی ، یا ترانه سسی یا نوحه سسی

فاطمه نوكری فرمانبر اولار ، پیرو مكتب پیغمبر اولار

فاطمه نوكری بیر سؤز دانیشار ، باشیدا گئتسه اگر دوز دانیشار

فاطمه نوكری نین اؤلمز آدی ، بئله نوكر ایكی گونده آقادی

ائی قلم یاز سؤزووه مشتری ام ، فاطمه نوكرینین نوكری ام

فاطمه نوكری پر سوز و گداز ، گرك اولده ائده تبلیغ نماز

متقی نوكر اولار نوكر ناب ، اهل بیتی دولانار باشدا حجاب

گئج كوسر ، كوس سه باریشماز زهرا ، بد حجاب ایله دانیشماز زهرا

فاطمه نوكری پر كین اولماز ، قره پرچم لره بدبین اولماز

بئله ختم اولدی قیامی خانیمین ، شیعه یه چوخدی پیامی خانیمین

سسی الآن دا گلیر معنا ده ، اگر اویاخسان ائشید ای دلداده

اوندا كی دوشدی وجودی خطره ، وئردی اعلامیه متن بشره

من كی چیخمام حرم تقوا دن ، اؤتمیشم چهره می نابینا دن

آزمایش گونی بی واهمه ام ، من هوادار علی ، فاطمه ام

وصل ائدیبدیر منی طاها بو گونه ، بویوروب ام ابیها بو گونه

در و دیوار آراسیندا قالارام ، جانیمه بئله بلانی آلارام

قدّیمی بار بلا ایسه اگر ، تازیانه قولیما دیسه اگر

بئش ایل عمر ائیله ماقی خوشلامارام ، من علی نین اته این بوشلامارام

دین گرك حفظ اولا بو رونقینن ، حق علی نن دی علی ده حقینن