+0 به یه ن
جللاد! سنین قالاق قالاق یاندیردیغین كیتابلار
مین كمالین شؤهرتىدیر٫ مین اوره یین آرزیسى….
بیز كؤچه ریك بو دونیادان٫ اونلار قالیر یادیگار.
هر ورقه نقش اولونموش نئچه اینسان دویغوسو
مین كمالین شؤهرتىدیر٫ مین اوره یین آرزیسى….
یاندیردیغین او كیتابلار آلوولانیر….یاخشى باخ!
او آلوولار شؤعله چكیب شفق سالیر ظولمته…..
شاعیرلرین نجیب روحو مزاریندان قالخاراق
آلقیش دئییر عئشقى بؤیوك٫ بیر قهرمان میللته.
او آلوولار شؤعله چكیب شفق سالیر ظولمته….
جللاد! منیم دیلیمده دیر بایاتیلار٫ قوشمالار
دئ٫ اونلارى هئچ دویدومو سنین او داش اوره یین؟
هر گرایلى پرده سینده مین آنانین قلبى وار….
هر شیكسته م اؤولادىدیر بیر موقددس دیله یین
دئ اونلارى هئچ دویدومو سنین او داش اوره یین؟
سؤیله سن مى خور باخیرسان منیم شئعیر دیلیمه؟
قوجا شرقین شؤهرتىدیر فوضولىنین غزلى!
سن مى “ترك خر” دئییرسن اولوسوما٫ ائلیمه؟
داهیلره سود وئرمیشدیر آذربایجان گؤزه لى….
قوجا شرقین شؤهرتىدیر فوضولىنین غزلى!
جللاد! یانیب اود اولسا دا٫ كوله دؤنمه ز آرزیلار٫
طبیعتین آنا قلبى قول دوغمامیش اینسانى!
هر اوره یین اؤز دونیاسى بیر سعادت آرزیلار
قانلار ایله یازیلمیشدیر هر آزادلیق دستانى….
طبیعتین آنا قلبى قول دوغمامیش اینسانى!
ازل باشدان دوشمنیمدیر اوزو موردار قارانلیق…..
هر تورپاغین اؤز عئشقى وار٫ هر میللتین اؤز آدى
كاییناتا ده ییشمه رم شؤهرتیمى بیر آنلیق
منم اودلار اؤلكه سینین گونش دونلو اؤولادى!
هر تورپاغین اؤز عئشقى وار٫ هر میللتین اؤز آدى!
نه دیر او دار آغاجلارى٫ دئ٫ كیملردیر آسیلان؟
اویونجاق مى گلیر سنه وطنیمین حاق سسى؟
دایان!….دایان!….اویاق گزیر هر اوره كده بیر آسلان
بوغازیندان یاپیشاجاق اونون قادیر پنجه سى
اویونجاق مى گلیر سنه وطنیمین حاق سسى؟
جللاد! سن مى٫ دئ٫ قیریرسان فداییلر نسلینى؟
میللتیمین صاف قانىدیر قورد كیمى ایچدییین قان!
زامان گلیر…من دویورام اونون آیاق سسینى
شهیدلرین قییام روحو یاپیشاجاق یاخاندان
میللتیمین صاف قانىدیر قورد كیمى ایچدییین قان!…..
بیر ورقله تاریخلرى٫ اوتان منیم قارشیمدا
آنام تومریس كسمه دى مى كئیخوسرووون باشینى؟
كوراوغلونون٫ ستتارخانین چلنگى وار باشیمدا
نسیللریم قویمایاجاق داش اوستونده داشینى
آنام تومریس كسمه دى مى كئیخوسرووون باشینى؟
سور آتینى٫ دؤرد نالا چاپ! مئیدان سنیندیر ….آنجاق
من گؤروره م آل گئیینیب گلن باهار فصلینى….
قوجا شرقین گونسشىدیر یاراندیغیم بو تورپاق
من یئتیردیم آل بایراقلى اینقیلابلار نسلینى
من گؤروره م آل گئیینیب گلن باهار فصلینى!
یاشاسین آذربایجان