وفالی قادین

كئچمیش لرین سؤزودور بئله روایت ائله ییرلر كی ، ایكی ار – آرواد ، عائله قوران واخت شرط كسیرلر كی ، عومورلرینین سونونا قده ر ، بیر – بیرلرینین قئیدینه قالیب ، همیشه جان دئییب – جان ائشیتسینلر . بئله ده اولور .

اونلار خوشبخت یاشاماغا باشلاییرلار . كیشی آخشاما كیمی چؤلده اكینچی لیك ائله ییر . آرواد – دا ائو ایشلرینده ن باشقا یون اییریب  ، شال توخویور.

ایكی انسانین صادق حیاتینی گؤره ن كند اهالی سی لاپ حئیران قالیر .

هامی بو عاییله نی او قده ر تعریف له ی ، اونلارین شهرت لی هر یئره یاییلدی .

گونلرین بیر گونونده بو كیشی نین آروادی نین تعریفینی بیر باشقا قادین ، بگ خانیمینا سؤیله ییر .

بیر بئله تعریفی ائشیدن بگ آروادی حرصیندن لاپ آز قالیر ، باغری چاتلاسین . او اؤز – اؤزونه دئییر :

-         اونون مندن هاراسی آرتیقدیر ، هامی اونو تعریف له ییر . اؤلسم ده ، قالسامدا گرك گئدم اونو گؤره م.

بگ آروادی واخت گزیردی ، اری ائودن چیخماق همن ، گئدیب بو آروادی گؤرسون .

ایش او یئره چكدی كی ، بگ بیر نئچه گونلوك سفره گئتمه لی اولدو .

بگ گئتمه یینده اولدو . آرواد – دا ، پال – پالتارینی عوض ائله ییب ، باشلادی تعریفی گؤیلره چیخان قادینی آختارماغا .

بو قاپی منیم – او قاپی سین ، دئیه آختارا – آختارا گلیب آخیردا گزدیكی یئری تاپدی .

اؤزونو دیلنچی گؤركمینه سالان بگ آروادی قاپینی دؤیوب پای ایسته دی . بو آرواد – دا دیلنچیه بیر آز پای وئردی .

سونرادا گئدیب ، ایش باشیندا اگلشدی و بگ آروادی حَیَطه باخیب گؤردو ، آروادین قاباغینا جه هره ، گونون آلتیندا یون اییریر . یانیندا بیر پایچا قورو چؤرك و بیر قابدا ایلیق سو وار . بگ آروادی قاپیدان بویلانیب ، گؤردو حیطین او طرفینده اوجا – اوجا یاشیل یارپاقلی آغاجلار وار . بو حكمتدن باش چیخارا بیلمه ین بو دیلنچی آرواد ایچری گیریب اوندان سوروشدو :

-         آی باجی حیطینده گؤزه ل آغاجلار وار . نییه اونلارین كؤلگه سینده اوتورماییب ، گون ایستیسی آلتیندا اگله شیرسن ؟

آرواد دئدی :

-         ایندی منیم اریم ، بو ساعات چؤلده ایستی گونون آلتیندا تاخیل اكیر ، جوت سورور ، اونون كؤلگه لنمه یه یئری یوخدور ، من اوندان آرتیق دئییلم كی ؟ اونون یانیندا قورو چؤرك ایستی سودان ساوایی بیر شئی یوخدور . من اوننان عائله قوران زامان عهد باغلاییب ، آن ایچمیشدیم ، او نه جور ایشله سه من ده ائله ایشله ییم . من بئله ائله مه سم اریمین چكدیگی زحمت لرینی دویمارام . اریم ده منیم صداقتیمی گؤروب منی آرتیق سئوه ر.

بگ آروادی ، اونون عاغلینی یوخلاماق اوچون اوندان سوروشدو :

-         باجی من نه سایاق ائله ییم ، اریم مندن راضی قالسین ؟

آرواد دئدی :

-         سن منه ایكی اوچ آصلان توكی گتیره بیلسن بو سیرری من سنه یاخشی اؤیره ده بیلرم .

بگ آروادی او گوندن آصلان آختارماغا باشلادی . آخیردا گلیب ، بیر شهرین وحشی حیوان خاناسینا چاتدی . گرردو بوردا پولاد قفسین ایچینده ائله گوجلو آصلان لار وار ، گل گؤره سن . آدام باخاندا لاپ آز قالیر باغری چاتلاسین . آرواد چوخ گؤتور – قوی ائله ییب ، اؤلچوب بیچندن سونرا ، آخیردا بو قرارا گلدی هر گون آصلانین یئمه گینی – ایچمه گینی ارزو وئرسین .

آرواد گونده ایكی ، اوچ دفعه گلیب ، قفسین كناریندان آصلانین یئمه گینی وئردی . قاباغینا سو قویدو .

آرواد بو وحشی حیوانین محبتینی اله گتیریب ، اونون باشینی سیغاللادیغی یئرده جانیندان بیر نئچه توك قوپاردی.

بگ آروادی آصلانین توك لرینی گتیریب ، او قادینا گؤستردی و او قادین بگ آروادینا دئدی :

-         سنكی بو وحشی لیكده حیوانی رام ائله میسن ، اوندا ارینله ده خوش رفتار ائله سن ، اودا سنی اینجیتمز . چوخ ایستر .

بگ آروادی او دئین كیمی اری ایله یاخشی رفتار ائله دی و اری اوندا راضی قالدی . بگ آروادی ایناندی كی همین آرواد دوخروداندا چوخ عاغیللی و آندینا ، عهدینه صادق اولان خانیم دیر.

چاپ اولمامیش ناغیل لار