یالواردیم قوروما اورمو دنیزیم !

+0 به یه ن

یالواردیم قوروما اورمو دنیزیم !

ساشدی قولاغیمی آجی بیر خبر :

« اورمو قورویور ، اورمو دنیزیم »

اؤزومو تله سدیم یئتیردیم اونا

یالواردیم قوروما اورمو دنیزیم !

***

دوز – توپراق گؤزومو یول چكدی گؤردوم

شپه لر سوراغین ، یئللردن سوردوم

ذنیزی گؤرمه یه اؤزومو یوردوم

یالواردیم قوروما اورمو دنیزیم !

***

داشلاندی گؤزومدن اوشاقلیق چاغی

دنیزین بؤیرونده او زنبیل داغی

بیر یاندا سرگیلی اوزوملر باغی

یالواردیم قوروما اورمو دنیزیم !

***

جومولوب لپه لر قوینون اویاردیق

گمینین سسینی اوزاق دویاردیق

چیممه یی یورولوب ، هئچ بیر دویاردیق ؟

یالواردیم قوروما اورمو دنیزیم !

***

ایستینی باتاردیق سرین لیینه

شورلوقدان جوماردیق درین لیینه

اؤزلمر او چاغین شیرین لیینه

یالواردیم قوروما اورمو دنیزیم !

***

اوخوردوق دریادا وار دریالیقلار

شورویدون ، یوخویدو سنده بالیقلار

جوشاردیق بایراقین داغ دالغالیقلار

یالواردیم قوروما اورمو دنیزیم !

***

پخنلر ، لجنلر دردلره درمان

قومونو قویلانان بولموش یئنی جان

خسته لر هله نی گؤزلور قالاسان

یالواردیم قوروما اورمو دنیزیم !

***

دوغرانیب كسیلیب قولون – قانادین

تاتووو ، باراندوز همده جیغاتین

بیچیلمیش دالغالار ، شاهلانان آتین

یالواردیم قورما اورمو دنیزیم !

***

ایندی ساحیلینی روزگار لار گزیر

دالغاسیز قئیینی دوز تیكان بزیر

كؤچه ری قوشلارین باغرینی ازیر

یالواردیم قوروما اورمو دنیزیم !

***

بئله سورسه دوزلاق اورمونو اودار

زمیلر ، باغلاری شورانلیق بودار

اوزانان دوز شالی بوینوموزا دار

یالواردیم قوروما اورمو دنیزیم !

***

دنیزیم قوروسان دایانار قانیم

قورویار اكینیم ، باغیم ، بوستانیم

چؤل قالار یام – یاشیل آزربایجانیم

یالواردیم قوروما اورمو دنیزیم !

جعفر بزرگ امین ( یارین )

آفتاب آذربایجان درگی سی


آچار سؤزلر : اورمو,


radyo dinle