+0 به یه ن
حئیوانلارین توپلانتیسی ، پاییزین سون گونلریدی . مئشه سس سیز – سمیر سیز ، آددیم – آددیم قیشا دوغرو حئیوانلار توپلاشیب .
آسلان اورتادا : گلین گؤرك ایشلریمیز نئجه اولور ؟ بیز بیلمیریك ، طاعون خسته لییی هاردان گلیب بیزی تاپیب . بیزده ، آتالار سؤزو وار ، هر هانسی میللت سوچلو ایشلریندن ال چكمه سه ، طاعون خسته لییی توتارلار . آما سوچلارندان قاییتسالار خسته لیك ده قاییدار ! اونون اوچون ، بیزیم وریمیزدن اوز وئرن هر هانسی یانلیشلیغی بوینوموزا آلمالی ، ظلم ائده نی ده اؤلدوروب آرادان قالدیرمالی ییق .
قافلان : بو همن دوز سؤزلرین بیریدیر .
تولكو : یاشاسین باشقانیمیز .
آسلان : هره اؤز بیلدییین سؤیله سین ، خسته لییی یئر اوزوندن قایتاراق . ایندی ای منیم قوهوم – قارداشلاریم ، سؤزومه قولاق وئرین ، نه دئدیم اونو ائدین . نه چوخ اؤلو و یارالیلار ، چؤلده یئره سریب گلمیشم !! ایندی منیم بو ایشیمین هاراسی سوچلودور ؟
تولكو : یوخ ، یوخ ، سن اولوسان و بؤیوكسن . ای ییرتیجیلارین بؤیویو ، بوتون حئیوانلاری اؤلدور ، راحاتلاشاق !
قافلان : من اؤزوم هده قورخویلا بوتون دونیانی بوروموشام ، ایندیسه گئجه نی گؤزلورم ، قارانلیقدا اوشاقلاری اوغرولایام . ایندی سیز منی قینایاجاقمی سینیز ؟
تولكو : یوخ ، یوخ ، قافلان بی . سیزین بؤیوكلویوز هر هانسیمیزا بللی دیر .
آیی : من تارلالاری داغیتدیقدان سونرا ، باغلارا دا رحم قیلمادیم . هر كنددن گئدیرمسه ده اورانین اوشاغینا دا – بویویونه ده آمان وئرمه دیم ، منی قینایاجاقمی سینیز ؟
قافلان : او ایش قینامامالیمی دیر ؟ سن قینامالی ایش گؤرمه سن !
تولكو یاناكی – یاناكی باخیب ، اوزون قولاغا دئدی : ای حئیوان ، دینمز – دینمز نه اوتوروبسان ؟ نه سؤز دییه بولرسن ؟
قورد : دئ گؤروم نه سوچ ائتمیسن ؟
اوزون قولاق : منیم سوچوم یوخدور . خاطیریمه گلن سوچلو ایش گؤرمه میشم .
قورد : ای یارانمیشلارین آلچاقدان – آلچاغی هاچاغدان بئله دیل آشمیسان ؟ گرك دئیه سن ، نه ایشلر گؤرموسن . نه سوچلارا قول قویموسان .
اوزون قولاق : دوزون آختارسانیز ، بیر گون آخشام چاغی آجیقمیشدیم ، گئجه ده یاخینلاشیردی ، بو اوجاغین یاخینلیغیندا اؤلوشگه میش بیر یاپراق تاپدیم !
تولكو : اوندان یئدینمی سن ؟
اوزون قولاق : هه یئدیم !
قافلان : اوندا سن بوینووا آلدین !
قورد : اؤلمه لی سن .
آسلان : بیزیم آنا یاسامیزدا اوجاغین هنده ورینده هر زادا ال وورولسا سوچدور . بو او كیمسه دیر كی اوجاغین اوتلاریندان اوتلاییب ، طاعون خسته لییین یاییملانماسینا قول قویوب . توتون بو حئیوانی و یاندیرین ، تانری یا قوربان گركیر ، بیزه ساغلاملیق .
قافلان : بیز ایله چیخ ائشییه .
قورد : اؤلوم اولسون بیزیم خسته لییمیزه قول قویانلارا ، اؤلوم !
تولكو : دئمه لی ، زورلو اینسانین یامانیدا یاخشی اولور ! نئجه كی گؤجسوزلرین آتدیقلاری آددیم ایله دانیشدیقلاری هر بیر سؤزده یامان اولور !!!
یازار : احمد شوقی ( مصر ادبیاتچی سی )
چئویرن : تبریزلی
آفتاب آذربایجان درگی سی ، شماره 49