بئله روایتائدیرلر ، قدیم اوزاق بیر كند ده بیر آنا ایله اوغول بیرلیكده یاشاییرمیشلار . اونلارین دونیا مالیندان هئچ زادلاری یوخ ایمیش . آری اؤلن گوندن بری آرواد ، اوغلونون لازیم اولان احتیاج لارینی تأمین ائتمك اوچون آغیر زحمتلره دؤزوب ، الیندن گلنی اسیر گه میردی . مثلاَ قونشولارین ، قویونلارین ساغیب ، پالتارلارین یوماقلا باشلارینی دولاندیریردی .

گونلر گئچیر ، آی دولانیر . كیچیك احمد عمللی – باشلی بؤیویوب ، جاوان بیر اوغلان اولوب . آرواد دئییر : ای اوغول ایندی منیم قوجالیق و سنین ده ایشله مه لی وقتیندیر . اولماسا بیر ایش فیكرینده اول ، بلكه یاشاییشیمیزی دولاندیرا بیلك . اوغلان آناسی نین سؤزون راضی لیق وئریب ، سحر ایش دالینجا شهره گئده جگم – دئییر .

اوزوزه خئیرلی سحرلر آچیلسین . سحر آچیلیر ، اوغلان گئدیر شهره . بیر چوخلاری كیمی اودا شهرین مئیدانچاسیندا دایانیب گؤزله ییر ، بیر نفر گلیب اونو ایشه آپاراجاق . احمد نه قدر گؤزله ییر ، گؤرور یوخ ، اونو هئچ دیندیرن اولمادی ، اؤزوده ناهار آز قالیر . احمد گؤرور یوخ ، اون گون ده دایانسا ایش بئله قاباغا گئتمه یه جك . اونا گؤره شهری دولانمافا باشلاییر ، بئله الینه بیر شئی دولاشسین . اوغلان خیابانلاری ، كوچه لری گزدیكجه اومیدسیزلشیر . آخیردا گلیب ، آیری ائولردن گؤزل و جلاللی اولان بیر ائوین قاباغیندا دایانیر . بیر نئچه دفعه ایسته ییر قاپینی دؤیسون ، آنجاق جرأت ائله میر . نهایت اوره گی چیرپینا – چیرپینا یاواش جا قاپینی دؤیور .

هاچاندان – هاچانا ائوین اربابی گلیب قاپینی آچاندا احمدی گرروب سوروشور : هه اوغلوم كیمی ایسته ییر سن ؟ سؤزون نه دیر ؟ احمد اوتانا – اوتانا باشینی آشاغی سالاراق ، « ایش دالینجا گزیرم » – دئییر.

ارباب دئییر : لاپ عجب ائله ییر سن ، ائله من ده سنین كیمی بیر ایشچچی آختریردیم . همین گونده احمد ، اربابین ایشچیسی اولاراق گؤزله ییر ، ارباب دئسین فیلان شئی گتیر . گؤرور یوخ ، بیر گون گئچیر اربابدان خبر اولمور اونا ایش گؤردورسون . سحریسی ده بئله اولور . اوچونجو گون دؤردونجو گونه كئچنده احمد اربابین یانینا گئدیب ، بو باره ده نیگران اولدوغونو سؤیله ییر . ارباب دئییر : اوغول گئت ایش وقتی اؤزوم دئیه رم .

بونون اوستوندن بیر نئچه گون كئچیب ، كئچمه میش ارباب احمدی چاغیریب ، امو وئریر ، بیر اینك كسیب ، دریسینی سویسون . احمد اربابینین امرینه باش اییب ، تئز بیر اینك تاپیب ، دریسینی سویاندان سورا ، دوه لری طؤوله دن چیخاریب ، بوش چوواللاری اونلارین اوستونه آتیب ، اینك دریسینی ده گؤتوروب ، ارباب لا بیرلیكده یولا دوشور . آز گئدیر ، چوخ گئدیرلر ، آخیردا اوجا بیر داغین اته گینده دوه لری دایاندیریرلار . ارباب احمده دئییر : تئز اول بو دری یه بورون گؤروم ، نه اولر . ارباب اینك دریسینی احمده بورویاندان سورا ، دوه لری كنارا چكیب ، اؤزوده قاچیر ، ایری بیر داشین دالیندا گیزله نیر . آز كئچمه دن بیر نئچه قیقی گلیب ، درینی قانادلاری آلتیندا داغین زیروه سینه آپاریب ، یئره قویاندان سورا دیمدیكله مه یه باشلاییرلار .

او قدر دیمدیكله ییر لر ، دری بیر نئچه یئردن دلیك – دلیك اولور . احمد قورخوسوندان دئشیكلری ییرتیب ، اؤزونو بیر تهر ائشیه چیخاریر . قیرقیلار اوندا قورخوب ، اوچوب گئدیرلر .

احمد باخیب گؤرور داغین اوستو جواهیر لر – له دولودور . ارزوده مین ایل قالا بوردان آشاغی یئنه بیلمه یه جك . احمد یان – یؤرونه گؤز گزدیرنده گؤرور داغدا جواهیر قدر آدام سومویوده ، وار . اونلاری گؤروب آرتیق قورخویا دوشن احمد بیرده آشاغی باخاندا گؤرور اؤز اربابی داغین اتگینده دایانیب . احمد باغیریب ، دئییر : ارباب من بوردان نئجه قورتارا بیله رم ؟

ارباب دئییر : اورداكی جواهیرلرین هامیسینی آشاغی تؤكندن سورا دئیه رم نئجه گلرسن .

یازیق احمد داغین باشیندا هر نه قدر جواهیر ئواریدی هامیسینی آشاغی تؤكندن سونرا دایاندی گؤرسون اربابی اونون آشاغی ائنمه سینه نئجه یول گؤسته ره جك . گؤزونه دؤوندویوم ارباب دوه لرینی یوكله یندن سونرا آرخایین – آرخایین شهره یوللانیب ، گئتدی . احمد كور – پئشمان دایانیب ایشین آخیرینی گؤزله ییردی ، بیردن - بیره بؤیوك بیر قیرقی اونون باشی اوستونده دایانیر ، اونا بیر خطر یئتیرمك ایسته دیكده احمد اؤزونو ساخلاییب ، قیرقی نین آیاق لاریندان برك – برك یاپیشیب ، آغیرلیغینی داغین آشاغی طرفینه سالیر . قیرقی یوخاریا ساری قانادلانیر ، احمد ده آغیرلیغینی آشاغیا سالیر . آخیردا احمدین آیاغی داخین اته گینده یئره ده یندن یونرا قیرقی نین آیاقلارینی بوشلاییر . قیرقی اوچوی گئدیر ، احمد ده شهره قاییدیر .

احمد توو دابانا دئییب بیر باشا اربابین قاپیسینا گلیر ، گؤرور ارباب اونو تانیمیر ، تانیسایدی دا احمدین اورادان سالیم قاییتماسینا اینانمازدی . چوخ ایلردن بری بو حیله ایله داغین باشینا گؤندردیگی یوزلرجه جاواندان بیری ایندیه كیمی ساغ قاییدا بیلمه میشدی . اربابین طرفیندن آرخایین اولان احمد قاباقكی كیمی ایش دالینجا گزدیگینی ، بیللندیرندن سونرا ارباب اونو ایشلتمه یی قبول ائله ییر . ارباب قاباقكی كیمی بیر گون بئله ایكی گون بئله احمده هئچ ایش بویورمور . احمد یئنه ده اونون عیلله تینی سوروشاندا ، لازیم اولان گون اؤزوم دئیه رم ، سؤیله یه رك اونو آرخایین ائله ییب ، دئییر ، گئت قیچلارینی بیر – بیری نین اوستونه آشیریب ، راهات اوتور ، هئچ نه یین ده فیكرینی ائله مه .

وقت یئتندن سونرا ارباب احمدی چاغیریب دئییر ، تئز اول بیر اینك دریسی ، بیر نئچه بوش چووال حاضیرلا ، بئش آلتی دوه ایله چؤله چیخاجاییق . احمد تئز اربابینین امرینی یئرینه یئتیریر . بیر اینك كسیب دریسینی سویاندان سونرا ، بوش چوواللاری گؤتوروب دوه لرین اوستونه سالیب یولا چیخیرلار .

آز گئدیرلر ، چوخ گئدیرلر آخیردا اوجا بیر داغین اته گینه چاتیرلار . اربابین امری ایله احمد اینك دریسینی یئره سریب ، نه ایش گؤره جه یینی اربابدان سوروشاندا ، ارباب دئییر ، یات بو دری نین ایچینده اونو اؤزونه بورو ، دئییر : باشارمیرام . سیز اوّل منه اؤرگه دین ، سونرا نه دئسز اونو ائله رم . ارباب دری نین ایچینده اوزانیب ، اونو عمللی – باشلی اؤزونه بورویندن سونرا احمد وقتی تلف ائله مه ییب ، درینی ایپ ایله برك – برك ساریییر .

سونرا دوه لریقراغا چكیب ، ایری بیر داشین دالیندا گیزله نیر . بیر آز كئچیب ، كئچمه میش بیر نئچه قیرقی گلیب ، درینی چكیب داغین باشینا آپاریر . سونرا درینی دیمدیكله مه یه باشلاییرلار . قیرقیلار درینی ییرتاندان سونرا ، اربابا قورخو ال وئریر . اؤزونه قوّت وئریب درینی بیر تهر ردّ ائدیر . قیرقیلار اونو گؤرن كیمی قورخودان اوچوب گئدیرلر . ارباب حیله نین نئجه اولدوغونو بیلندن سونرا چیغیریب احمده دئییر : دئ گؤروم سن او وقت بو داغدان نئجه دوشدون ؟ منه ده اؤرگتسن بوتون وار – دؤولتیمی سنه تاپشیراجاغام . احمد گؤرونه دؤندویوم ده او احمدلردن دئییلدی بیرده بو كیمی بوش سؤزلره آللانسین . قاییدیب اربابا دئییر : سن اورداكی جواهیرلری بیر – بیر تؤك یئره سونرا دئیه رم نئجه گل .

ارباب جواهیرلری بیر – بیر تؤكندن سونرا ، گرزله ییر ، احمد اونون آشاغی ائنمه سینه یاردیم ائده جك . احمد ده دوه لری جواهیرله یوكله یندن سونرا ، ایسته ییر یولونو توتوب گئتسین ، داغین باشیندان اربابین سسی گلیر . احمد بس منی قویوب هارا گئدیرسن سن آللاه منه ده اؤرگت ، گلیم آشاغی .

احمد یولونو گئده – گئده چیغیریب دئییر :

من گئتدیم ، سن ده اورداكی ، سوموكلردن اؤگه نیب ، گلرسن . بئله لیكله ارباب اؤز عملینه راستلاشیر . احمد ده اؤز زحمتی نین نتیجه سیندن همیشه لیك اولاراق یوخسوللوقدان قورتاریر .

چاپ اولمامیش ناغیللار

بهروز ایمانی – اكبر رحیم زاد فرجی