بیز بوغولدوق، او كیشی اؤلدو

+0 به یه ن

« علی » گلدی « ممد »ین قولاغینا یاواشجا پیچیلدادی. علی، « سینا » استخرینده غرق نجات دیر. یانی هر كیم بوغولسا تئز آتیلاجاقدی سویا اونو چیخارتسین. دئمك اولار عزرائیل ین بازارین كاساد ائله ینلرین بیریسی دیر. ممد ده همن استخرده اولار. اوتورار « پذیرش » ده، اوزمه یه گلنلره یئتیشر. هردن ده میكروفونو آچیب اوزن لره « عزیز اوزن قارداشلاریمیز استخرین تایمی بیر ساعات یاریم دی ها. بعضی لر دئییر بس اوچ ساعات دی، ایر واختیز قورتولوب زحمت اولماسا چیخین » ایكی سئری عینی جومله نی تكرار ائدر. دئمك اولار باش مودور اولمایاندا ممد استخرین باش مودورو دور.

« ایكی – اوچ نفر گلدی دئدی اونا خاطیر گلدیم دئدیم یوخسا منیم نه ایشیم وار، نه موشكولو وار كی، آمما ... » علی نن ممدین آراسینداكی پیچیلدیدان ائشیتدییم سؤزلردی. ممد دئدی « به من نییه گؤرمه دیم ایندی گئدیب مسئوللارینا دئیه رم چاغیرار ائشییه » چوخ ماراقلاندیم بیلم نه دن دانیشیرلار. دایی اوغلوم « حمید » گلدی دئدی ایندی « سونا خشك » دا اووروب با. آ ممد گئت. ممد اوزونده كی گؤزلویو گؤزونه آیارلاییب سونایا ساری گئتدی. سانكی ساواشا گئدن عسگرلر كیمی قیلینجین كمرینه بركیدیردی. دایی اوغلوم حمید ده استخرین ایشله یه نلریندن دیر. ائله اونون سایه سینده منده تئز – تئز اورا گئدیرم.

ممد گئدندن سونرا حمیددن سوروشدوم « هن، حمید نه خبردی؟ » « هئچ! بیر نفر گلیب ایچری اوزو بیرجوردو، اوزونون بیر طرفی، گؤزو ... بیرجوردو دا » حمید الیله اؤز اوزونه ایشاره ائله یه – ائله یه توضیح وئریردی نه اولدوغونو.

ممد گلدی. « آ ممد من گئدیم بیر گؤله » دئییب، سونایا طرف گئتدیم گؤرم ماجرا نه دیر. دوشلار اولان یئرده او « اوزو بیرجور اولان » كیشی نی گؤردوم. او ممد دئدییی مسئولدا یانیندا ساللانا – ساللانا بیر دوشا طرف گئدیردیلر. قیخ یاشیندا اولاردی او كیشی. اوزونون ساغ یانی جوزام اولموشدو. ساغ گؤزوده كیچیكیدی. نه بیر كلمه دانیشدی، نه بیر سؤز دئدی. دوش آلیب قورولاندی. باشین سالدی آشاغی آچاری وئریب گئتدی. ایندی آنلادیم نه یه ایچری گلنده چوخ باخدی ممده. بیر دیقه كیمی باخدی. بلكه ایسته ییردی سوروشا « آغا اییره نمزلر من گئتسم ایچری؟ » بلكه اوتاندی سوروشسون. آمما ممد دانیشیردی، گؤرمه دی. آچاری وئردی.

آللاه بیلیر هر گوزگویه باخدیقجا نه لر گؤروردو؟ نه لری گؤرموردو؟ هئچ گؤزگویه باخارمی دی؟ آللاه بیلیر ... آللاه بیلیر نئچه اوشاغین آتاسیدیر؟ آللاه بیلیر نه لر چكیب؟ چكه جه یین ده آللاه بیلیر.

منجه علی یه گلیب دئینلر، علی ، ممد ، حمید بیرده من بوغولدوق. بیز بوغولدوق او كیشینی اؤلدوردوك ...

آتیلا سلمانی



radyo dinle