+0 به یه ن
غیب دن یئتدی بیزه مژده كی جانانه گلیر
نازنین زلف پریشانه چكیب شانه گلیر
عزت و شوكت ایله او بت فرزانه گلیر
قیل تماشا گؤزوم او سرو خرامانه گلیر
تؤكمه گه عاشیقی نین قانینی مردانه گلیر
***
اولدی مایل یئنه بیر آفت دورانه كؤنول
آز قالیب شعله چكیب عشق اودونا یانه كؤنول
جان فدا ائیله گیلن او شه مردانه كؤنول
باخیبان سیر ائله او مه تابانه كؤنول
قیل تماشا گؤزوم او مهر درخشانه گلیر
***
ائیله دی ماه رخی عاشیقینی یاد گئنه
اولدی ویرانه كؤنول مژده دن آباد گئنه
دل اولوب غصه و غم دن بوگون آزاد گئنه
باده ی وصل رخ یار ایله دلشاد گئنه
می وحدتدن اولوب گؤر نئجه مستانه گلیر
***
روز اول كی گؤزوم او مه تابانه باخیب
گؤزونون یاشی ایله دجله لر عمانه آخیب
اشكیمی دانه سی گردنینه عقده سالیب
قدی خجلت اودونا سرو خرامانه یاخیب
اؤزی صد طعنه ووروب یوسف كنعانه گلیب
***
گل بیخار آچیلیب گلشن جان ایچره بوگون
روح تك جلوه ائدیر ملك روان ایچره بوگون
یوخ اونون تك داها بیر شاه جهان ایچره بوگون
عدل كسرایی قیلیب كسر شهان ایچره بوگون
شوكتی وئردی شكست تخت سلیمانه گلیر
***
ای خوش او دم كی شهیم عاشیقینی یاد قیلا
لطف ایله رحم قیلیب صیدینی آزاد قیلا
ملك اسلامی ترحم ایله آباد قیلا
دشمنی خار ائدیب دوستلارینی شاد قیلا
تا ذلیل ائیلیه كفاری مسلمانه گلیر
حئیران خانیم