ساعات 7 ده " برج سفید " ین قاباغیندا !

+0 به یه ن

آقای زاد مكتوب لاری ترتیب له ییردی . تقریبن هر گون ایشی بو ایدی . اون ایله یاخین اولاردی كی پست ایداره سینده ایشله ییردی و اؤز ایشینه مقیّد اولان بیر ایشچی كیمی نظم لی و دقیق آدام ایدی .

او گون مكتوب لارین بیرینی یئرینه قویاركن گؤردو مكتوب اونون اؤز آدرئسینه گؤنده ریلیب . یونه باخدی . سؤزو یوخ ایدی . مكتوب اونا گؤنده ریلمیشدی . هوسله نیب ، چارپایانی چكیب اوتوردو . پاكاتی ایشیغا ساری توتوب ، مكتوب جیریلماسین دئیه سلیقه ایله آشماغا باشلادی . گؤزل خط له ، ماوی خودكارلا یازیلمیش مكتوبو اوخوماغا باشلادی .

« سلام ! بلكه سن منی تانیمیرسان ، آمما من ایللردی كی سنی تانیرام . بلكه ائله لاپ اوشاقلیق دان . آللاه آتا – آناوا رحمت ائله سین .  او قیزین دا اؤلوم خبرینی ائشیتدیم و چوخ اوزولدوم . آللاه اونا دا رحمت ائله سین . یادیمدا اوندا دئدین داها هئچ بیر قیزا اوره ك باغلامایاجاقسان. دئیه سن هله ده سؤزووون اوستونده سن . »

آقای زاد پاكاتین اوستونه باخدی . یوللایانین آدرئسی زادی یوخ ایدی ؛ « بیلیرم ، چوخ چتین دی . آدی نه ایدی ؟ سارا ؟ ماشاللاه یاخچی كؤكه لیب سن  . تازا ائوین ده موبارك دی . گئنه یازاجاغام سنه . فعلن . »

آقای زاد لاپ گیجه لمیشدی . مكتوبون ایمضاسی زادی دا یوخ ایدی . كیمین ایشی اولا بیلردی ؟ آخی هئچ كیم سارانین كیم اولدوغوندان خبری ده یوخ ایدی . بیر آناسی بیلیردی كی اودا آللاهین رحمتینه گئتمیشدی . یوخسا قبیردن خوتداییب اونا مكتوب گؤنده رجه یدی !

سارانین سؤزو اونو بتر چاشدیردی . نئچه آیلیق بیر دوستولوغون بیر تصادف له  بیتمه سی . شرفسیز ووراندان سونرا سارانی ماشینا قویوب گئتمیشدی . داها خبر ده چیخمامیشدی . او دا سارا ایله هئچ بیر قانونی ایلگیسی اولماماغا گؤره الی هر یئردن قیسا ایدی . عائیله سینی زادی دا تانیمیردی . یازیق قیز اؤزوندن اونا هئچ بیر معلومات وئرمه میشدی .

آقای زاد او گون آخشاما كیمی جرجه نك اولموشدو . فیكری هئچ یئره چاتمیردی . مكتوبو تئز – تئز آچیب اوخوماقدان كاغاذ بوزوشوب ازیلمیشدی .

گلن گونلر ایكینجی مكتوبون گلمه سینه بوتون مكتوب لاری نئچه سئری ال – ورق ائدیردی . آنجاق نئچه گون سونرا گلدی ؛ « سلام جانیم ! هلبت بو مكتوبو چوخ گؤزله ییب سن . بلكه اؤز – اؤزووه دئییب سن سارانی هاردان تانیر بو آدام . آمما داریخما . سنه بیر خوش خبریم اولاجاق . سارا دیریدی . بلكه اینانمیرسان آمما آللاهین اولدوغو كیمی دیر . سارا اؤلمیییب . گلن مكتوبومو گؤزله . فعلن . »

گئنه ده آقای زادین فیكری داغیلدی . كاغاذ الینده اؤز دوره سینه فیرلانیردی . گؤره سن بو كیمدی ؟ بیلمیردی سئوینسین یوخسا ... سارانین دیریلیك خبری عؤمرونون لاپ خوش خبری اولا بیلردی . خاطیره لر ذهنینده جانلاندی . سارای لا سون گؤزوش لری یادینا دوشدو . همیشه كی كیمی گولوردو سارا . بیر آز ناراحات ایدیسه آمما گولوردو . قارا كیلاسورون دا سول الینده توتوب ساغ الی ایله تاكسی یا ال ائله دی . « مستقیم » دئدی . سونرا آقای زادا باخیب « فعلن » دئدی .

گلن گونلر داها آغیر كئچیردی . ایشینده سورعتلی اولان آقای زاد ایندی واسواس لا هر مكتوبو اؤز یئرینه قویوردو . گاهدان دا مكتوب لاری گؤنده رنه حیرصله نیب « منه كارآگاه بازلیق ائلیر . سیش قوتول دا ! » دئییردی . دوشونوردو بلكه طرف پول دان زات دان ایستیر . ائله یه بیلردی ائوینی ساتسین . سارانی گؤرمه یه هر نه دن كئچردی . آنجاق بیر هفته دن سونرا اوچونجو مكتوب دا گلدی .

« سلام ! عوذر ایستیرم . بوندان تئز یازانمازدیم . لوطفن شوكه اولما . من سارایام . » سارا كلمه سی داها ایری و گؤزل یازیلمیشدی . آقای زادین گؤزلری دولدو . ال لری تیتره مه یه باشلادی . اوره یینین دؤیونتوسونو قولاغیندا ائشیدیردی .

« دوزون ایسته سن من هئچ تصادوف زاد ائله مه دیم . او طرف منی ایستیردی قاچیرتسین . تهدید ائله میشدی اونونلا ائولنمه سم آبریی هر یئرده آپاراجاق . حتتا وقت ائله مه دیم سنه ه دییه م. منی باغیشلا . دئ گؤروم هله ده سئویرسن منی ؟ سئومه سن ده بونو بیل كی همیشه لیك منیم اوره ییمده سن . ایستیرم گؤرم سنی . فقط سن آللاه دئمه یوخ . قورخدوم اولده ییه م اینانمییاسان . گلن هفته چارشنبه ساعات یئددی ده « برج سفید » ین قاباغیندا . گؤزلورم سنی . خاهیش ائلیرم گل . فعلن . »

آقای زادین حالی اصلن اؤزونده دئییلدی . ال لری تیتره ییردی. یئریندن دورماغا هیری یوخ ایدی . دوستوندان چرشنبه یه نئچه گون قالیر یوخلایاندا دوستو « صاباحدی » دئییب اونون باشینا گلدی « حالین یوخدی دئیه سن . نه اولوب ؟ »

آقای زاد گولومسه یه رك « خئییردی . نیارانچیلیق یوخدو ... » دئدی . اداره دن چیخیب سلمانی یه گئتدی . اؤزونه بیر جوت تازا باشماق آلدی . یاخشی بیر عطیر ده آلدی . لاپ اؤزونه یئتیشیردی . آخشام ائوه یئتیشنده بتر یورقون ایدی . ارز – اؤزونه دئییب « ائوه یئتیشمه لی یم ، بلكه گلدیخ بورا . هئچ اولماسا قوی گؤسون نه مرتب آدامام . »

دوز گئجه نین یاریسیناجاق قاچا - قاچدایدی . نه ناهار یئمیشدی نه شام. هئچ مئیلی ده چكمیردی . باشینی یاستیغا قویان كیمی یوخویا جومدو .

بو نئچه ایده بئله راحات یاتمامیشدی . یوخوسو آیدین ایدی ، گؤزل ایدی . سحر دوراندا آنجاق یوخونون گؤزللیییندن سووای بیر زاد یادیندا قالمامیشدی .

تئز گئیینیب ائودن چیخدی . سونرا بیر زاد یادینا دوشن كیمی قاییدیب كشودان خیردا پول گؤتوردو . مرخصی آلماغی اون دیقه ده چكمه دی .

موتورخانانین خراب اولماغینا گؤره سویوق سو ایله یویوندو . دوشون آلتیندا دوشونوردو سویوق سو اعصابا یاخجیدی . عجب قاریت چیخاتمیشدی . « داغا زادا گئتمه لی یم » دئیه دوشوندو . گئیینه – گئیینه كوچه لره سو سپمیشم ماهنی سینی فیشقا چالیردی . فیشقاسی دا هئچ دوز چیخمیردی ، فیشقا یئرینه هاوا پیله ییردی . اوستونه عطیردن سپیب ، اوتاقدا وار – گل ائله دی . سارانی او قیراقدا معصومجاسینا اوتورماغینی تصوّر ائتدی .

بیر دسته گول توتدوروب قرارا ساری گئتدی . ایراد – میراد اولماسین دئیه یولدا توكان لاری شوشه سینده اوستو – باشینا باخیردی . ساعات آلتیدا یئتیشدی . بیلمیردی بو بیر ساعاتی نئیله سین . تئز – تئز ساعاتا باخیردی . بو ایشی بیر عؤمور حرفه ای ساعاتا باخان كیشی لره تای گؤروردو . قولونو قالخیزیب ، بیله یینده كی ساعات گؤروشسون دئیه الینی بیر آز قاباغا گتیردی . سونرا ساعاتا باخیردی ، بلكه ده باخمیردی .

ساعات سكگیز اولدو و كیمسه گلمه دی . بونا فیكیرلشمه میشدی . یانی اونو سریییب لر ؟ آمما بو اولمایان بیر ایش دیر . بو سؤزلری فیط سارا بیلیردی . یانی سارا اونو اله سالیب ؟ بیر آز دا دایاندی آمما اومودسوز و یازیق آداملار كیمی قاییتدی ...

ائوین چیراغ لارینی یاندیراندا ، ائو اونا غریبه گلدی . دسته گولو سارا تصور ائتدییی یئره آتیب میزین باشیندا اوتوردو .

فیشقا چالا – چالا جیبیندن قلمی چیخاریب ، میزین اوستوده كی آغ كاغاذ دا یازدی ؛

« سلام ! جیددن عوذر ایستیرم . بیر ایش چیخدی قاباغیما گلنمه دیم . شرمنده . صاباح نئجه دی ؟ صاباح ساعات یئددی ده « برج سفید » ین قاباغیندا گؤزلورم . سئویرم سنی . فعلن . »

حامد احمدی

چیراق درگی سی – یاز 1389 – سیناق سایی


radyo dinle