من بو یازیدا چالیشیرام بولدوقلاریمینان آختاریشلاریمدا تاپدیقلاریمی یازام . اولماسین بیر نفر گلسین دئسین یالنیش یازمیسان ، آمما دئمه سین دوزو نه دیر .

چرشنبه آخشامی آذربایجانین اسكی عنعه لریندن اولاراق ، بو یورد دا ایلین سون آییندا 4 چرشنبه نی عزیزلشدیمه نی گؤروروق . بو دورد گون بونلاردیلار : یئل چرشنبه سی ، توپراق چرشنبه سی ، سو چرشنبه سی و اود چرشنبه سی . بونلاردان تكجه اود چرشنبه سی ایندی عزیزلنیر .

بو گونلری بو آدینان دا آدلاندیرارمیشلار ؛ ترتیب ایله : "چیله قووان یا یالانچی چارشنبه یا قره چارشنبه" ، "كول چارشنبه" ، " موشتولوق چی" و "آخرچهارشنبه" .

آخیر چرشنبه یه یاخین گونلرده ، آذربایجان قادین لاری بازا گودیب ، گؤزگو ( آیینه ) ، كوپ ، یئنی پالتار ، فیندیق ، نوخود و باشقالارین آلارمیشلار .

اود چرشنبه سینده آذربایجان گنج لری ائولرین دامیندا اود یاندیریب بو شعرلری اوخویارمیشلار :

" آتیل باتیل چرشنبه

بختیم آچیل چرشنبه

باش آغریم ، دیش آغریم

بوردا قالسین چرشنبه "

بو اودون كولونو ، كوچه قاپیسی نین ائشییی ، ایكی طرفینده دیوارین دیبینه تؤكردیلر .

بیگ لر ده بو گونده داملاردا اولان باجادان ائوه شال ساللاماق ایله ائو صاحابیندان بایراملیق ایستردیلر . ائو صاحابی دا او شالا یئمه لی ، پول ، آلما ، یومورتا یا باشقا شئی لر باغلاردی . شهریار بو عنعه نی بئله تعریف ائدیب :

بایرامی دی گئجه قوشی اوخوردی ، آداخلی قیز بیگ جورابین توخوردی ، هر كس شالین بیرباجادان سوخوردی ، آی نه گوزل قایدادی شال ساللاماق ، بیگ شالینا بایراملیقین باغلاماق ، شال ایسته دیم منده ائوده آغلادیم ، بیرشال آلیب تئز بئلیمه باغلادیم ، غلام گیله قاشدیم شالی ساللادیم ، فاطمه خالا منه جوراب باغلادی ، خان ننه می یادا سالیب آغلادی.
قیزلار بو گونده پنجره لرین قیراغیندا یا قاپیلارین دالیندا دوروب ائوده كی لرین سؤزلرینه قولق وئرردیلر . قیزلار بو ایشینن ایستردیلر اونلارین ایستك لرینی بیلیب اؤز ایستك لری ایله مقایسه ائله سینلر .

چرشنبه گونونده ده میللت بولاق لار باشینا گئدیب ، 3 یا 7 دفعه سویون اوستوندن آتیلماق ایله اؤزلرینه یئنی ایلده ساغلاملیق آرزولارمیشلار . اونلار یئنی ایلده بولاق لارین سولاری تازالانماق اعتقاد ایله ، بو گون ده كوپ لرینی سیندیریب ، یئنی كوپ لری بولاق سویی ایله دولدوروب ، اونو ائوین بوجاقلارینا سپیب ، چای قویوب ایچرمیشلر و تانری دان یئنی ایلده بركت دیلرمیشلر .

تأسف له بو عنعه لردن ایندی جه یالنیز شال ساللاما ، او دا نئچه كند ده قالیب و قالانی اونودولوب .

بو یازیدا اولان یالنیش لاریمی حتما منه بویرون !

احمد محمدخانلو

24/12/1389