+0 به یه ن
غم چكمه عموغلی هله بو ملت آییلماز
آج لوت قالا داییم، چكه مین ذلت آییلماز!
مشروطه اوچون تؤكدوله بو شهرده قانلار
قانون اساسی دئیه جان وئردی جوانلار
آخیرده یئنه حوكمران اولدو بیزه خان لار
كئچدی باشینا توربا داهی امت آییلماز
غم چكمه عموغلی هله بو ملت آییلماز
هر عصرده توش اولدو بلایه یازیغ ایران
اولموشدو سپر جور و جفایه یازیغ ایران
سون گونده اسیر اولدو دضایه یازیغ ایران!
چكدی نه قدر رنج و ستم ، محنت آییلماز
غم چكمه عموغلی هله بو ملت آییلماز
ایران لی اسیر دیر اونو قول خالق ائدیب الله
حاققین طلب ائتسه اولاجاق عرضده گمراه
لازم دئییل ایرانلی هر ایشدن اولا آگاه
چوخ برك یاتیب اولسا نه قدر صحبت آییلماز
غم چكمه عموغلی هله بو ملت آییلماز
عصرافیل ایر صوری چیخیب عرشده چالسا
هئچ دورمایاجاقدیر نه قدر بو دالی قالسا
گر مخلوقونون احوالینی مندن خبر آلسا
هركس دییرم دورما چاتیب فرصت آتیلماز
غم چكمه عموغلی هله بو ملت آییلماز
ایران لی گرك اولماسین آفاق ده آزاد
قان آغلاییب ائتسین گرك او ناله و فریاد
همسایه لری ائتسه ایر لطف ایله امداد
دوشمز باشا ائتمز عبداً همت ، آییلماز
غم چكمه عموغلی هله بو ملت آییلماز
بئش یورقانین آلتیندا بو تنبل نئجه یاتمیش!
چیخمیر نفسی فیس – فیسی دیر قان تره باتمیش
توپ گولله لری عالم امكانی اویاتمیش
واه .. واه ! اونو قویماز دورا بو غفلت ، آییلماز
غم چكمه عموغلی هله بو ملت آییلماز
بیر گون گلجك من گؤرورم دیك دوراجاقسان
اطرافه باخیب باشه جوت اللی ووراجاقسان
هر یئرده گئدیب بوینونو مطلق بوراجاقسان
وئر اوندا ریاسیز سؤزومه قیمت آییلماز
غم چكمه عموغلی هله بو ملت آییلماز!
محمد بی ریا