بو ناغیل ین اوخوماسینی ، اوشاخلار اوچون توصیه ائله میرم

قارا گؤز

قار دنه لری پامبیق گولو تكین هاوادا اوچا – اوچا اوردا – بوردا اوتوروردو . آمما اوتورمامیش یئنه یئل اونو گؤیه قالدیریب اوینادا – اوینادا داش قیه لره چیرپیردی . كیشی تیفتیك بؤركونو قولاقلارینا قدر آشاغی چكیب ، بویون شالینی آغیز و بورنونو اوستونده بركیدیب ، گؤزلرینی قیییب ، بیر قارا جیزیق كیمی گؤرولن گؤزلرله اویان بویانی ایزلیه – ایزلیه یول گئدیردی . هردن بیر قار دنه سی كیرپیكلرینین اوستونده اوتوروب گؤز قاباغینی توتودوقدا الجكلی الینین دالیسیلا گرزلرینی سیلمك زوروندا قالیردی و یولا دوام ائدیردی . بیر آز دینجلسین دئیه دوروب ، دورد یاشیندا اولان قیز اوشاغینین باغلیسینی بئلینده بركیدیب سییتمه سینی اله آلیب یئنه یول گئتمه یه دوام ائتدی . چؤلون اوزو ال ایچی تكین صاف گؤرونوردو . او قدر داش قیه دن و چوخور یوكسكلیكدن بیر گؤرونتو گؤرولموردو . كئچن ایكی گونده یاغان قار چؤلو صاف ائتمیشدی .

یوبح آلاچرپوو ایشیقلاناركن قره گؤز كندیندن ائشییه چیخدی . دونن گئجه قونشولار اونلارین ائوینده جومالاشیب هر بیریسی بیر اؤنری وئرمیشدی . نئچه گون ایدی كیچیك قیزی خسته لنیب باش قولاغی پؤرتوشوب قیب قیرمیزی اولموشدو . كندین یاشلی قادین لاری داوا – دووادان و چول – داغ بیتگی لریندن اللرینه هر نه گلسه گتیریب دمله ییب خسته كیچیك قیزین بوغازینا تؤكموشدولر آمما بیر فایدا گؤرمه میشدیلر . اؤزللیكله دونندن اوشاغین حالی پیسله میش دای نفس چكمه سی زور اولموشو . اودور كی قونشولار كیشی نی زورا قویدولار صاباح اوشاغی شهرده حكیمه گؤتورسون . بیر ایكی سی ده ایسته ییردی اونا یاردیم ائتمك اوچون شهره گلسینلر . آمما او قبول ائتمه میشدی . صوبح آروادی ایسته میشدی جاوان اوغلونو یوخودان قالدیرسین آتاسیلا برابر شهره گئتسین ، آمما كیشی نین اوره یی راضی اولمامیشدی .

صوبح قالین پالتار گئییب شالوارین پاچالارینی یون جورابین آلتیندا دولاما كیمین بركیدیب آروادین آغلار ؤزلرینه باخمایاراق ، اوشاغی بئلینه چاتیب بیر شال ایله مؤحكم باغلاییب سییتمه سینی اله آلیب یولا دوشموشدو . قاپیدا آروادی اوندان ایسته میشدی شهردن قاییداندا مومكون اولسا بایرام سوفره لرینه بیر آز نوغولدان – پولكدن و پوك شیرنیدن آلیب گتیره ، بیرده ایسته میشدی نابادا – نابادا اوشاغی خسته خانادا یاتیراسان ! اونلار اوشاغی اؤلدوررلر ، اودا اؤلسه من اؤللم ؛ هر نه اولسا قایتار گتیر . كیشی بولاری دوشونه - دوشونه كندی گئریده قویدو . اونلارین گندی ؛ دره یز داغی نین گون چیخان الینده بیر تپه نین اوستونده تیكیلمیشدی . اؤنجه لر كند ، اللی آتمیش ائوییدی ؛ آمما چوخو شهره كؤچموش و ایندی یالنیز اون ائوه یاخین قالمیشدی . قره گؤزدن مرنده ایكی یول واریدی . بیری قیسا یول ؛ دره طرفیندن كی ایندی بو قاردان سونرا اوردان گئتمك چوخ تهلیكه لیدی و ایكینجی یول داغ تپه باشیندان آیراندیبی كندینه و اوردان ماشینلا مرنده گئتمك یولویدو . اونلارین كندلینه ماشین یولو یوخویدو و نورمالدا آیراندیبی یه چاتماق اوچ – دؤرد ساعات سورردی . كیشی ایكینجی یولو سئچیب آیراندیبی یه چاتماسین دئیه یولا دوشدو .

ایكی گون آرا سیرا قار یاغاندان یونرا دونن هاوا آچمیشدی آمما دئیه سن بو گونده قارلایاجاق . ایكی كند آراسیندا بیر كیچیك آیاق ایز یولو واریدی ایندی قار آلتیندا ایتمیشدی . گئتدیكجه قارین یاغاماسی كولك ایله برابر ؛ چوخالیردی . كیچیك قیز هردن بیر خفه سسیله اؤسكوروردو و كیشی اونون ایستی نفسیندن آنلاییردی كی قیزین تبی چوخ یوكسكدیر . آللاه آللاه ائدیردی قار كسه كی او تئز آیراندیبی یه و سونرا مرنده چاتیب قیزینی تداوی ائده . اوره یینده یئره گؤیه سؤیوش وئریردی كی نییه اؤنجه كی گونلر اوشاغی شهره گؤتورمه ییب و داوا – دووا ایله اوشاغی تداوی ائتمه یه چالیشیبلار . قیزی اؤلسه آروادینا نه دئیه جك ؟! كاشكی اودا شهره كؤچیدی . اودا ائلیه بیلردی شهرده فهله لیك ائده ، یاخود ال چرخینده میوه ساتیب ، قورو چؤرك توپلویا .

چالیشیردی آیاغی بودوره مه سین ؛ آمما آددیملارینی اوجا گؤتوروردو . كوله یین سسی كیفیر آهنگله قولاغینی آزارلاییردی . قار دنه لری بیر آغ پرده كیمین گؤیدن یئره چكیلیب ، اونون گؤرمه یین آزالدیردی . كیشی نین اوره یینده بیر گیزلین قورخو واریدی. هردن دؤنوب اویان – بویانا باخیردی . نییه كی یاخشی بیلیردی دره دیزین قوردلاری قافلان كیمین گوجلودورلر . اوره یینده دوعا ائدیردی اونلارلا راستلاشماسین ، آمما نه ائتسین كی بیردن گؤزو بئش آلتی دنه لیك بیر قورد دسته سینه دوشدو كی اونون آردینجا سونجوخلویا – سونجوخلویا آددیملاییردیلار . كیشی نین اوره یی تؤكولدو . گؤز آلتی قوردلارا باخا – باخا آددیملارینیاوجالدیب نهایت قاچماغا باشلادی . قوردلار اوندان توولو قاچیب اؤنونو كسدیلر . كیشی نین آیاغی بیر چوخوردا بوشا گئدیب اوزو اوسته قارارا سره لندی . قار اوستونده سورونوب اؤزونو سیییتمه سینه چاتدیردی و تله سیك آیاغا قالخیب سییتمه نی مؤحكم اوووجلادی . قوردلار دایره نی داراتدیلار . اونلارین دیللری ائشیه ساللانیب آغیز بورونلاریندان بوخار چیخیردی . بیر – ایكی سی پنجه لریله قاری قازیب گؤیه سوووروردو .

كیشی عؤمرونده قورد چوخ گؤرموشدو آمما بو قدر قورخوب زهله سی گئتمه میشدی . قوردلارین بیری – ایكیسی كیفیر حالدا اووولدوردولار . كیشی ایسته میردی قوردلارلا چیرپیشا . آرزونو یاواش یاواش آیراندیبی یه ساریه چكیردی . بو حئین ده قوردلارین بیری سیچراییب گؤیه قالخدی كی كیشی نین اوستونه اوتورسون . كیشی دؤزمه دن سییتمه نی قالدیریب قوردون قافاسینا چیربدی . قوردون قافاسی پارچالانیب قان ائشییه ووردو . قوردلار قانی گؤرركن كیشی یه ساری یوگوردولر . كیشی یئنه قاچماغا باشلادی . بئل شالی بوشالمیشدی و كوچوك قیز اونون آرخاسیندا گؤیه قالخیب دوشوردو و اونون قاچیشینین تووونو آلیردی . قوردلارین بیری آرخادان گؤیه قالخیب كیچیك قیزین شالدان ائشییه دوشموش قیچینی آغزینا آلیب قوپارتدی . كوچوك قیزین آغلاماغا جانی یوخویدو ، بیر ضعیف ناله ایله ائی وای دئییب ، آجیشمادان آتاسی نین تویلریندن یاپیشدی . قورد اونون اتینی آغزیندا اویان بویانا آتیب اوتدو . قیزین آیاغیندان قان یئریه سوزوردو . كیشی نین بویون شالی آچیلیب یئره دوشدو . چاره سیز كیشی اویان بویانا باخیردی كی بلكه بیر یاردیم تاپا بیله . آمما بیر شئی گؤرمه دن آغلاماقا باشلادی . اوره كدن چیغیردی یا ابوالفضل ... سونرا سییتمه نی قالدیریب یاخینداكی قوردون بئلینین اورتاسینا چیرپماق زوروندا قالدی . هم قوردون بئلی قیریلیب یئره یاتدی هم ده اونون سیییتمه سی ایكیه بؤلوندو . كیشی بیر آز دا قاچدی . آمما بئلینده كی شال آچیلیب كیچیك قیز یئره دوشدو . قوردلار اوشاغی دؤوره له ییب دیدمه یه باشلادیلار . كیشی چیغیرا چیغیرا آغلاییردی . اوشاغ الدن گئتمیشدی . كیشی بیلمیردی نه ائتسین ، اوشاغی بوراخیب اؤز جانینی قورتارسین یا اونون یاری لشینی .

پیچاغینی چیاخاردیب قوردلارا ساری یوگوردو . پیچاخلا قوردلارین بیری نین بؤیرونو سوكدو . قیزی یئرده چابالاییردی و ایستی قانی قارلاری اریدیب قیزاردیردی . كیشی دیزه چؤكوب اوشاغین دیدیلمیش لشینی باغرینا باسدی . آغلییا – آغلییا اوزونو لشه سورتوب ، دوداق آلتی دئدی : قورخما قیزیم ؛ قورخما ، بوردایام ...

قوردلارین بیری كیشی نین بئلینه آتلادی . كیشی بؤیرو اوسته قارلارا ییخیلدی . دبَشمه دن اوبور قورد كیشی نین خیرتلاغیندان یاپیشیب باشینی مؤحكم گئری یه چكدی . كیشی نین خیرتلاغی قوپوب قوردون آغزیندا قالدی . كیشی خیریلدیا – خیریلدیا بئلی اوسته یئره سره لندی . او زاماندا اوشاغی یانینا چكیب الینی اوستونه قویوب گؤیه باخدی .

قار دنه لری رنگ به رنگ پولك شكلینده یئره دوشوردولر و و یئل له برابر اوینایا – اوینایا اؤزلرین داش قیه لره چیرپیردیلار . بیر آزدان سونرا قانلاردان بیر ایز گؤرولموردو . قوردلارین اووولدوسو اوزاقلاشیردی . چؤلو آغیر بیر سكوت بوروموشدو .

میر هادی سید مرندی

آفتاب آذربایجان سرگی سی

52 – اینجی سایی