+0 به یه ن
احسان اولسون !
گؤیلومی ایسته سه هر كیمسه هراسان اولسون
اودا من تك گؤروم آخیرده پریشان اولسون
مین گؤیول حسرت نان ایله پریشان اولسا
قویمارام دلبریمین زولفی پریشان اولسون
هر كیم ایستیر وطنیندن قاچا دیوانه كیمین
تا اؤلونجه قالا غربت ده ، مسلمان اولسون
مومن كامل ایدیم بنده فراوانلیقدا
كافر اولدوم ، بو گرك كی باهالیقدان اولسون
بوش یئره خلقه پلو وئرمه ، منیم حقیمی وئر
شول الذمه ددن ارواحینا احسان اولسون
گؤرورم ضوقه گلیب سن دالین ایستیر حجمت
واقتی واردیر ، هله قوی ماه حزیران اولسون
گئده ! من زور ایله خلقین یولونی كسمه میشم
بوردا كئچمیر عملی ، عازم تهران اولسون
منه لازیمدی اوباشدانه پلو ، شامه كباب
سنده سعی ائیله قازان ، سفره ده شوربان اولسون
گرچه اون دانه یلیم واردی ماهوت تره زری
حاجی سئومیر دئییر از مخمل كاشان اولسون
موعدی كئچمیش بولارین ایسته میرم ای خیاط
منه بیر یل تیكه سن اینیمه چسبان اولسون
لكن اما سنه بیر یل تیكه رم تهرانی
حاجی خوشلانسا گرك مزدی فراوان اولسون
بئله شئیلرده حاجی ، كان سخاوت دی باجی
وئره جك ایسته دیگین هر نئچه تومان اولسون
فقط اما كاسیبا بیر قره تنبل وئرمز
گرچه باشدان آیاغا پیكری عریان اولسون
یوخسول همسایه سینین حالینی گؤرمور مطلق
بئله دؤلتلی گرك قانینا غلطان اولسون
معجزین اولماسا افطاره كبابی – آشی
قورخورام خاچ سالیب او بوینونا ، آلمان اولسون
معجز شبستری