گؤی تپه

اورمیه نین اسكی تپه سی

اورمیه آذربایجانین اسكی و تاریخی شهرلریندن ساییلیر. بو شهرین قراغیندا یئرلشن چوخلو تاریخی آبیده و اسكی تپه لر ( آلتی مین ایللیك ) بو سؤزو ثبوت ائدیر. گؤی تپه اورمیه نین قوزئی دوغوسونون 6 كیلومئترلییینده یئرلشیر.

گؤی تپه اورمونون اسكی تپه لرینین ان آدلیملاریندان اولاراق زنگین ایزلرله دولودور و آذربایجانین فخر ائدیجی تاریخی نین گؤستریجی لریندندیر. 1948 – جی میلادی ایلینین قازینتیلاریندان اؤنجه اینگیلیسلی لر بو اسكی بؤلگه ده 1313- جو گونش ایلینده بیر لؤوحه اوستونده ناخیشلی قیلقمیش شكیل اله گتیردیلر. بو بؤلگه دن اسكی تانریلارلا ناخشیلی اولان استوانه لر ده تاپیلیبدیر.

قازینتیلارا باشچیلیق ائدن اینگیلیسلی « بورتون براون » اؤز آراشدیرمالارینی « آذربایجان قازینتیلاری » عنوانیله 1948 و 1951 – ده لندنده یایینلامیش و او یازیدا آذربایجان و گؤی تپه تمددونون بئله ایضاح ائدیبدیر:

« گؤی تپه نین یئددی قاتی ( طبقه سی ) واردیر، بو قاتلارین ان اسكیسی میلاددان اؤنجه 4- جو مین ایللییه ( 6 مین ایل بوندان اؤنجه یه ) قاییدیر. بو قاتدا چین – چین ائولر، قیرمیزی ساخسی قطعه لر و ناخیشسیز بوز ساخسیلار، آچیق ساری بویادا ساده هندسه خطلرله – قهوه رنینده – میس و داشدان اولان آراجلار واردیر.

آلتینجی قات : میلاددان اؤنجه اوچونجو مین ایللیكدن، میلاددان اؤنجه بیرینجی مین ایللییه دك قاییدیر. داشلی خیملی ( فنداسیون ) و پالچیقدان اولان آبیده لر، كوره ده بیشمیش و ایكی بویالی و ناخیشلی ساخسیلار قهوه رنگلی و قیرمیزی – قارا بویالی مركب هندسه ناخیشلارلا – قطعه لر بو قاتداندیر.بو قاتدا میسدن اولان آراجلار بوللوجا گؤرونور. بو تمددون داش دئورینه و دوغو آنادولونون میسی نه و آرازین قوزئیینده كی آذربایجانلا ان چوخ باغلیلیقی واردیر.

بئشینجی قات: بو قاتین ساخسیلاری بوز، گاهدان قارا و عمومن سورتولموشدورلر. بورادان قاباریق ( برجسته ) ناخیشلارلا اولان ساخسی تاپیلیبدیر. بو ساخسی آنادولو و آرازین قوزئیینده كی آذربایجان تمددونلارینا بنزری چوخدور.

دؤردونجو قات: قارا بویادا و سورتولموش و ناخیشسیز اولان ساخسیلار واردیر.

اوچونجو قات: بورادا بیرینجی اینسانلارین قبیرلری و آذربایجانلی لارین آتا – بابالارینین جومجومه لری واردیر، بو قبیرلردن تاپیلان ساخسیدان اولان قطعه لر قیرمیزی بویادا و بعضی لری ایسه الوانسیز ناخیشلاری و بئشینجی قاتین ساخسیلارینا اوخشاری واردیر.

ایكینجی قات: میلاددان اؤنجه 1200 و 1500 ایللرینه قاییدیر، سورتولموش ( صیقلی ) قارا و بوز بویادا ناخیشسیز ساخسیلارلا دولودور. بونلار آنادولونون هیتیت ساخسیلارینا اوخشاییر.

بیرینجی قات: بو قاتدا قیرمیزی و بوز بویالاریندا سورتولموش ساخسیدان اولان قاب – قاجالار واردیر. بونلارین اوستونده حئیوانلار دسته لرینده شكیل لر چكیلیبدیر. بو قاب – قاجالار حسنلی تپه سینده تاپیلان قاب – قاجالارا بنزه ییرلر. گؤی تپه نین اوستونده یونولموش داشلاردا واردیر. بو یونولمو داشلار، حئیوان ناخشلاری ( اؤرنك اوچون قوچ و قافلان ) واردیر. بونلار دوغوشدان قاباق ایكینجی مین ایلییین سونلارینا و بیرینجی مین ایلییین ایلك لریندندیرلر. بو داشلار آنادولونون اسكی لی یونولموش هیتیت داشلارینا بنزری چوخدور.»

قایناقلار :

1-   اورمیه آدلیملاری ( نام آوران اورمیه ) 4- جو ص

2-   اورمیه دارولنئشاطینین تاریخچه سی ( تاریخچه دارالنشاط اورمیه ) 24- جو ص

یازار: حسین واحدی

« آفتاب آذربایجان » درگی سی