+0 به یه ن
بیری وار ایدی ، بیری یوخ ایدی ، بیر پادشاه لا بیر وزیر وار ایدی ، بیر گون بونلار اوودان قاییداندا یولدا بیر قاری یا راست گلدیلر.
پادشاه آتین باشینی ساخلاییب دئدی :
- آی قاری ، بورادا نه گزیرسن ، ایشین – چئشه ن ندیر ؟
قاری دئدی :
- منیم پئشه م ائو تیكمك ، ائو ییخاماق دیر .
پادشاه دئدی :
- سن نه سن كی ، ائو تیكیب ائو ییخاسان ؟
قاری دئدی :
- ای پادشاه سن هله بیلمیرسن كی ، آرواد ییخمایان ائو مین ایل تیكیلی قالار .
پادشاه قاری نین بو سؤزوندن ناراضی قالدی.
وزیر دئدی :
- قبله عالم ساغ اولسون ، قاری دوز دئییر .
پادشاه راضی اولمادی كی ، اولمادی . ائوه گلن كیمی هر ایكیسی مباحثه ائله دیلر.
پادشاهین اوچ قیزی وار ایدی . او ، ائوینه گلن كیمی قیزلارینی یانینا پاغیریب دئدی :
- قیزلاریم ، ائوی آرواد تیكیر ، یا كیشی ؟
بؤیوك قیز دئدی :
- ائوی البته كیشی تیكیر .
پادشاه دئدی :
- ساغ اول ، قیزیم دوز دئییرسن .
سونرا پادشاه اوزونو اورتانجیل قیزینا توتوب دئدی :
- قیزیم ، سن نه دئییرسن ؟
- اورتانجیل قیزی دئدی :
- - ای مهربان آتا ، آرواد نه دیر كی ، اونون تیكدیگی ائو نه اولسون ؟! البته ائوی كیشی تیكیر .
پادشاه بو دفعه ده كیچیك قیزیندان سوروشدو :
- قیزیم ، بس سن نه دئییرسن ؟
كیچیك قیز دئدی :
- آتا ، ائوی آرواد تیكیر .
- بو سؤز پادشاهی غضب لندیردی . او قیزا دئدی :
- ایندی كی ، بئله اولدو ، سنی ائوسیز – ائشیكسیز آداما وئررم. سونرا گؤرك نئجه ائو تكیه جكسن !
پادشاهین قیزلاری بورادا قالسین ، سیزه خبر وئرك فاطی قاری دان .
شهرین كناریندا قازما داخما دا فاطی قاری آدیندا بیر قوجا آرواد اولوردو . بونون احمد آدلی تنبل بیر نوه سی وار ایدی . احمد او قدر عاجز ایدی كی ، یئریندن ترپنمگه ده تنبل لیك چكیردی .
پادشاه همین قاری نی یانینا چاغیرتدیریب دئدی :
- قاری ، من كیچیك قیزیمی سنین نوه نه وئریرم . گؤرورم كاسیب آدامسان ، اودور كی ، گئدنده توی سوز – ناغارا سیز اونودا اؤزونله آپار .
قاری دئدی :
- ای پادشاه سنین قیزین هارا ، منیم نوه م هارا ؟ نوه مین اینینده بیر پالتاری وار كی ، جیندیریندان جین هوركور . یئمگه چؤرگی یوخدور . او ، شاه قیزینی نئجه ساخلایا بیلر ، گل سن بو فیكریندن ال چك !
پادشاه دئدی :
- قاری ، سنین ایشین یوخدور . آپار ، قیزی وئردیم نوه نه .
قاری نین علاجی كسیلدی ، قیزی یانینا سالیب گتیردی ائولرینه . احوالاتی نوه سینه سؤیله دی . احمد بو ایشه لاپ معطل قالمیشدی بیلمیردی نه دئسین .
قیز ائوه گلندن سونرا گؤردو كی احمد اوقدر تنبل دی كی ، هئچ یئریندن ترپنمك ایسته میر ، خؤرگی نی ده یاتدیغی یئرده یئییر . قیز چوخ عاغیللی ایدی . ائوه گلن گوندن باشلادی احمدی دیله توتماغا . بیرنیجی دفعه سفره نی ائوین یوخاری باشیندا سالدی . احمدی چاغیردی كی ، گی چؤرگینی یئ ، احمد نه قدر یالواردی كی ، منیم پاییمی گتیر یئریمده یئییم ، قیز راضی اولمادی . احمد گؤردوكی ، آجیندان اؤله جك ، علاجی كسیلدی ، سورونه – سورونه سفره نین قیراغینا گلدی . چؤرك یئییب قورتاران كیمی یئنه گئدیب یئرینه گیردی . بئله – بئله قیز هرگون سفره نی باشقا بیر یئرده سالیب ، احمدی اورایا چاغیریردی . بیر نئچه گوندن سونرا احمد داها اؤزو دوروب سفره نین قیراغینا گلیردی . قیز گؤردو كی ، احمد بیر آز قوچاقلاشیب . اونا گؤره چؤره گینی یئییب قورتاران كیمی یئنه گئدیب گیردی یئرینه . باشلادی یاتماغا .
آرادان بیر نئچه گون كئچندن سونرا پادشاه قیزی احمدی ایندی ده كوچه یه چیخارتماق فیكرینه دوشدو . قیز اؤیرنیشدی كی ، احمد قوز ، فیندیغی خوشلاییر. اودور كی ، بازاردان بیر – ایكی گیروَنكه قوز ، فیندیق آلدی ، اونو ائودن كوچه قاپی سینین آغزینا كیمی تؤكوب دئدی :
- احمد ، داها بسدیر ائوده خور ها خور یاتدیغین ، دور ، هئچ اولماسا بو فیندیق لاری ، قوز لاری ییغ ، گتیر یئیك .
احمد سورونه – سورونه بیر تهر قوزلاری ، فیندیق لاری ییغا ییغا كوچه قاپیسیندان چیخدی بیر آز او طرفه – بو طرفه باخیب یئنه قاییتدی ائوه . گیردی یئرینه . قیز گؤردو احمد كوچه یه چیخماغی اؤیرندی . باشلادی كی ، نه اولور اولسون گرك گئدیب ایشله یه سن .
احمد دئدی :
- منیم صنعتیم یوخدور ، نه ایش گؤره بیلرم ؟
- سن چیخ كوچه یه سسله ، ای ایش گؤردورن ، ای ایش گؤردورن ! كیم یاخینلاشیب بیر سؤز دئسه اوجوزونا – باهاسینا باخا . گئت ، او سنه ایش گؤردوره جك .
قیز احمدی بیر تهر كوچه یه چیخارتدی . احمد یولون اورتاسیندا دایانیب هئی دئییردی .
- آی ایش گؤردورن ، آی ایش گؤردورن !
بیردن بیر كیشی گلیب دئدی :
- اوغول ، منیم بیر باغیم وار ، گل اونو بئل له ، سنه بیر قیران پول وئریم .
احمد ایسته دی راضی اولماسین . قیزین سؤزو یادینا دوشدو . دینمز – سؤیله مز كیشینین یانینا دوشوب گئتدی آخشاما كیمی یئر بئل له دی . آخشام بیر قیران آلیب گلدی یولدا گؤدو بیر پیشیك ساتیرلار ، بیر قیران وئریب پیشیگی آلدی . احمد ائوه گلن كیمی پادشاه قیزی دئدی :
- احمد نه ایش گؤدون ، نه قازاندین ؟
احمد دئدی :
- بیر قیران قازانمیشدیم . اونو دا وئریب بو پیشیگی آلدیم .
قیز دئدی :
- احمد ، صاباحدان سن گرك بیر اوزاق یئره سفره چیخاسان گئدیب هر یئری گؤره سن .
احمد دئدی :
- من سفره نئجه چیخا بیلرم ، پولوم یوخ ، آتیم یوخ ، یولو تانیمیرام .
قیز دئدی :
- صاباح گئدرسن بازارا ، یولون كناریندا دایانیب گؤزلرسن . گؤره جكسن كی ، دوه كاروانلاری گئدیر . كاروان باشییا دئیرسن كی ، منی ده اؤزونوزله آپارین . سیزه كؤمك ائدیم . او ، راضی اولسا ، اونلارا قوشولوب گئدرسن .
احمد بیلیردی كی ، قیز دئدیگینی ائده جك . اونا گؤره دینمز – سؤیله مز راضی اولدو . سحر آچیلدی . گئدیب یولون كناریندا گؤزله دی . گؤردو بیر قاطار دوه گلیر احمد كاروان باشینا یاخینلاشیب دئدی :
- منی ده اؤزونوزله آپاریرسینیزمی ؟