« عاغیللی قیز » ناغیلینین ایكینجی بؤلومون ، بو یازیدا اوخویا بیلرسیز . بیرینجی بؤلومو ده گؤرمك ایسته سز ، « ناغیل » بؤلومونه باش وورون !

باخیش لاریزی گؤزلورم !

دئمه كاروان باشی كاروانین قاباغیندا بئله بیر آدام آپاریر . یولدا بیر صحرالیق وار ، اوردان كئچنده سولاری تامار قوتاریر ، همینصحرادا بیر سو قویوسو وارمیش ، كاروان باشی اؤزو ایله گؤتورن آدامی همین بو قویویا ساللاییب اورادان سو چیخارداردی .قویویا ساللانان آدام بیرد گئری قاییتمازمیش . قالیب اورادا اؤلرمیش .

كاروان باشی احمدی اؤزویله گؤتوروب یولا دوشدولر آز گئتدیلر ، چوخ دایاندیلار ، آز دایاندیلار ، گلیب همین قورو صحرایا چاتدیلار . سولاری تامام قورتارمیشدی . گاروان باشی دئدی :

• بالا ، گل سنی ساللایاق قویویا بیر آز سو چیخارت .

احمدین هئچ نه دن خبری یوخ ایدی دئیه راضی اولدی بئلینه ایپ باغلاییب ساللادیلار قویویا . احمد قویونون دیبینه دوشوب بئلیندن كندیری آچدی ، گؤردو بورا ائله یوكه یئردی كی ، اوجو – بوجاغی گؤرونمور . بیر خیلی یول گئدیب ، آخان بیر چایا راست گلدی . تولوقلاری دولدوروب هارای لادی چكسینلر . بیردن بیر نریتلی قوپدو ، آز قالدی باغری چاتلاسین . بیردن گؤردو بیر بد هئیبت دئو بودور كسدی باشینین اوستونو . احمد ایسته دی قاچا گؤردو ممكن دئییل . قاچماغا یئر یوخدور.

دئو دئدی :

• ای بنی آدم ، گرردوم قاچماق ایسته ییرسن . اونو بیل ، الیمدن هئچ یئره قاچا بیلمزسن . بورا قوش گلسه قاناد سالار . قاطیر گلسه دیرناق سالار . سن نه جرأت له گلیب بورا چیخیبسام ؟ ایندی بیل آگاه اول ، سندن بیر سؤز خبر آلاجاغام اگر دئزونو دئدین ، جانین قورتاردی ، دئیه بیلمه سن سنی تیكه – تیكه ائده جگم .

دئو اونو یانینا سالیب آپاردی اؤز سارایینا .

احمد گؤردو بورا ائله گؤزل بیر قصر دیر ، آدام باخاندان حئیران قالیر . هر یئری زر و زیبا . اوتاقلار قاش – داش ، لعل و جواهیراتلا دولو ، بیر جاه و جلال وار كی ، باخاندا آدامین آغزی آچیلا قالیر . دئو اوتاقدان – اوتاغا كئچیب اتپوتوز دوققوز قاپی آچدی ، قیرخینجی اوتاقدا قیزیل مجمعینین ایچینده بیر قورباغا گؤردو . دئو قورباغانین یانیندا داینیب دئدی :

• ای بنی آدم ، ایندی دئ گؤروم دونیادا ان گؤزل نه دیر ؟

احمد دئدی :

• دونیادا ان گؤزل شئی ، كؤنول سئوندیر .

بو سؤز دئوین چوخ خوشونا گلدی ، چون كی اؤزو همین قورباغانی سئویردی .

دئو احمدی اؤلدورمك فیكریندن ال چكدی ، اؤزونه ده بیر نار ایله بیر قوز باغیشلاییب آزاد ائله دی . احمد دئودن آیریلیب گلدی قویونون دیبینه ، نه قدر سسله دی هارایینا چاتان اولمادی . چونكی كاروان چوخدان گئتمیشدی . احمد گلنده بازاردان آلدیغی پیشیگی ده اؤزویله گتیرمیشدی . ائله كی كاروان یولا دوشدو ، پیشیك قویونون باشیندان ال چكمه دی . باشینی قویویا سالیب هئی میولدادی . پیشیك گئجه سحره كیمی قویونون یانیندا مییولدادی .

سحر تئزدن آیری بیر كاروان گلیب قویونون یانیندان گوچنده گؤردولر ، بیر پیشیك قویونون یانیندا بیر مییو مییو سالیب كی ، آدامین یازیغی گلیر . كاروان باشی اؤز – اؤزونه دئدی : « بوردا نه سه بیر سیر وار » قویویا یاخینلاشدی . گؤردو سس گلیر .

• ای یولدان كئچنلر ، منی قویودان چیخاردین !

كاروان باشی یولداشلارینی چاغیردی ، كندیر ساللایب احمدی قویدان چیخارتدیلار . اجمد باشینا گلن احوالاتی دانیشیب ، بونلارلا یولا دوشدو . گلیب قاییش بالدیرلاری تورپاغینا چاتدیلار . كاروان چی لار ایشلرینی یئر به یئر ائله ییب بیر ائوده قوناق قالدیلار . آخشام اولدو ، سوفره سالیندی ، اؤرتالیغا یئمك گتیرنده ائو صاحبی آروادلی – اوشاقلی هره سی الینه بیر توخماق  آلیب قوناقلارین باشی نین اوستونده دایاندیلار . قوناقلار بو ایشه معطل قالمیشدیلار . ائله بیلیردیلر ائو صاحبلری بونلاری اؤلدورمك ایسته ییرلر . كاروان باشی دئدی :

• آی قارداشلار ، بیزی اؤلدورمك فیكرینیز وارسا ، ائله چؤرك یئمه میشدن اؤلدورون ، جانیمیز قورتارسین . داها بو نه عادتدیر ، اوّلجه چؤرك وئریب ، یونرا اؤلدورورسونوز ؟

ائو صاحبی دئدی :

• بیز سیزی اؤلدورمك فیكرینده دئییریك قویون اورتالیغا چؤرك گلسین ، اوندا گؤررسینیز كی نه یی گؤزله ییریك .

بلی ، اورتالیغا چؤرك گلدی ، او ساعت هر طرفدن او قدر سیچان سیچووول تؤكولدی كی ، قابلاردا دیشه چكمه گه بیر سوموك ده قالمادی . الی توخماقلی لار . دئمه بو سیچانلاری گؤزله ییرمیشلر . بونلار باشلادیلار توخماقلا سیچانلاری وورماغا . جمعی سی بئش – اون سیچان اؤلدوره بیلدیلر . قالانلاری تامام خورك لری یئییب یووالارینا قاچدیلار . قوناقلار بو احوالاتا مات قالمیشدیلار . احمد ائو صاحبینه یاناشیب دئدی :

• قارداش ، سیزده بیر ایكی پیشیك اولماز می ، گتیریب ائوه بوراخاسینیز ، بو سیچانلاری كؤكونه كسه ؟

ائو صاحبی دئدی :

• پیشیك نه اولان شئی دیر ؟ بیزیم یئرلرده پیشیك تاپیلماز .

احمد گؤدو بورالاردا پیشیك اولمور . گئدیب اؤز پیشیگینی گتیردی . تزه دن خورك گتیردیلر . احمد پیشگی ائوه بوراخدی . سیچانلار چیخان كیمی پیشیك بونو بروادا ، اونو اورادا بوغوب هامیسین اؤلدوردو . ائو صاحبی بو ایشه حیران قالدی . اودور كی ، احمدله سوودالاشیب پیشیگی چوخلو قیزیلا آلدی . احمد قیزیل لاری ، دئوین باغیشلادیغی ناری ، قوزلا بیر آداما وئریب ائولرینه گؤندردی. اؤزو كاروان باشی ایله شهر به شهر ، كند به كند گزیب آل وئر ائله دیلر . بونلار بواردا قالسینلار گوراق احمدین آروادی نئجه اولدو ؟

قیز احمدین گؤندردیگی قیزیل لاری آلان كیمی بازاردان بنّا – فعله چاغیریب یئددی مرتبه لی بیر عمارت تیكدیردی . بو ائله بیر عمارت اولدو كی پادشاهی سارایی اونون یانیندا طؤیله یه اوخشاییردی . قیز احمدین گؤندردیگی ناری كسیب یئمك ایسته دی ، گؤدو نارین ایچی لعل و جواهراتلا دولودور . بو جواهراتی خیردالاییب ائوین ایچینی تامایم قیزیل – گوموش له دولدوردو .

آرادان بیر خیلی مدت كئچدی ، احمد سفردن قاییدیب گلدی . ائولرینین یئرینه یئددی مرتبه لی عمارت گؤروب حیران قالدی . قاپیدا گؤزتچیدن ائولرینین یئرینی خبر آلدی . گؤزتچی دئدی :

• سنین دئدیگین ائو ائله بو عمارت اؤزودور /

احمد ائله بیلدی كی ، گؤزتچی اونو اله سالیر . اودور كی دئدی :

• آی قارداش نییه منی آلدادیرسان ؟

بو واخت سسه احمدین ننه سی چیخیب اونو چاغیردی دئدی :

• آی بالا ، یوخسا ائویمیزی تانیمیرسان ؟ سن گئدندن سونرا آروادین تیكدیریب .

احمد ائوه گیریب جاه و جلالی گؤروب حیران قالدی . آروادی ائوی نئجه تیكدیردیگینی احمده سؤیله دی . سونرا احمدین گؤندردیگی قوزو سیندیردی  ، ایچیندن بیر دست پادشاه یانا ایپك پالتار چیخدی ، همین پالتاری ارینه گئیدیریب دئدی :

• احمد ، ایندی حاضیرلیق گؤروب آتامی قوناق چاغیراجاغام . او سندن نه خبر آلسا دوزونو دئیرسن .

بلی ، سحر آچیلدی ، قیز آتاسینی بوتون یاخین آداملاری ایله بیرلیكده قوناق چاغیردی . پادشاه قیزینین ائوینه گیرنده گؤردو بورادا بیر جاه و جلال وار كی ، هئچ اونون خزینه سینده ده بئله شئی لر یوخدور . قیز آتاسینی حؤرمتله قبول ائدندن سونرا اورتالیغا خؤرك گتیردی . سفره یه دونیانین بوتون ناز و نعمت لرینی دوزولموشدور . لذتلری خؤرك لردن یئییب ، دویاندان سونرا پادشاه احمددن سوروشدو :

• اوغول ، بو جاه و جلالی كیم دوزلدیب ؟ بو عمارتی كیم تیكدیریب ؟

احمد بوتون احوالاتی باشدان – آیاغا كیمی پادشاها سؤیله ییب دئدی :

• پادشاه ساغ اولسون ، بو دم دستگاهین هامیسینی سنین قیزین دوزلدیب . ائوی ده او تیكدیریب ، منی ده آغ گونه او چیخاردیب .

قیز بو سؤزلری ائشیدن كیمی اوزونو آتاسینا توتوب دئدی :

• آتا ، ایندی گؤردون كی ، ائوی آرواد تیكر !

پادشاه قیزین دوغرو دئدیگینی گؤروب باشینی آشاغی سالدی و دئدی :

• قیزیم ، سن حاقلی ایمیش سن !

پادشاه تزه دن یئددی گون ، یئددی گئجه توی ائله دی .

قایناق : آذربایجان ناغیللاری

كؤچورن : علی عبادی