عار

داواخانادا سیرا منه چاتیردی كی قاپی آچیلیب مشه صمد ایچه ری گیریب سالام وئردی. بیزیمله قونشو اولدوغوموزا گؤره یاخینلاشیب منله گؤروشدو. اونون چوخ گربود اللری وار ایدی. یادیما گلندن بیر آمریكایی بوز كاپشنی وار ایدی كی هاوالارین سویوق واتی اونو گئییردی. اونون آلتینداكی یون كؤینك ده كی یای با قیش اینینده اولاردی. باشینداكی پاپاقدان او قدر ایش چكمیشدی قارا رنگلی پاپاق ماوی رنگه چئوریلمیشدی. آلتینا اوچ دؤرد كره پنجه دابان سالدیردیغی قوندارالار خیابان قیراغیندا كؤهنه باشماق ساتانین الیندن قورتولاندان واكس اوزونه حسرت قالمیشدیلار. مشه صمدین شالواری دالی قاباقدان گؤزلرین آغاردیردی آمما صمدین اونو دییشمه یه هئچ قصدی یوخودو.

منیم ایسته دیكلریمی دوكتور نایلوندا ماسانین اوستونه قویوب پولونو حسابلادی. سیرا مشه صمده چاتدی. بیلمه دیم نییه مشه صمده نه لازیم اولدوغونو دوشوندوم. او اؤنجه بوكولموش پولو ماسانین اوستونه قویاراق « آ دوكتور منه بیر شامپو بچه وئر. » دئدی. گؤره سن مشه صمد شامپو بچه نی كیمه آلیر دئیه اؤزومدن سوروشدوم.  دوكتور بیر شامپو بچه وئردی. مشه صمد له بیرلیكده ائوه ساری یوللاندیق. او اوغلو ایرج دن دانیشیردی. گونده كی ایشی ایدی بوش واختلاریندا ایشی و گوجو ایرج دن دانیشماغیدی. او ایرجی ایللر بویو نذیر نیازدان سونرا تاپمیشدی. دئدیكلره گؤره تزه لیكده ایرج سیگار دا چكیردی. مشه صمد دئیردی : « بالا بو ایرج سرباز گئتسه باشینا نه اویون گله بیلمیرم. گئده ده آرپا بویدا آغیل آثاری یوخدو .» ایرج دن گیلئیلی اولماغی دانیشیغیندا بللی ایدی.

ها چالیشدیم شامپو بچه نی نه ائده جه یینی سوروشا بیلمه دیم. گونلر آرا سیرا مشه صمدی آخشام ایشدن ائوه دؤننده گؤروردوم هردن بیر آغ قیرمیزی گوللو نایلوندا بیر زاد آپاریردی كی ایندی اونون شامپو بچه اولدوغونا امین ایدیم. مشه صمدین بئله – بئله شئی لر آلمادیغینا گؤره چوخلارینین بئینینده بو سوال یارانمیشدی كی گؤره سن مشه صمد اوشاق شامپوسون اوشاق حوله سین و بی سیرا تمیزله ییجی شئی لری نه یه آلیر. قونشولارین دئدییینه گؤره بلكه ده مشه صمدین آروادی ایرج دن باشقا بیرده اوشاق دوغوب آمما كیمسه نین خبری یوخ. آمما بونلار یئرسیز دئییلن بوش سؤزلر ایدی.

داها وضعیت عادی اولموشدو. آمما باشقاسی گون مشه صمدین الینده اوشاق شامپوسون گؤرنده یئنی دن سورغولار بئینیمه جالاندی. بو دؤنه داها اؤزومو ساخلاشدیرا بیلمه ییب اونا یاخینلاشدیم. ال اوزالدیب گؤروشندن سونرا صمد عمی بو شامپولار نه یینه لازیمدیر سوروشدوم. مهربان و گؤلر اوزلو اولدوغونا گؤره؟؟ اونون وئردیییم سوالا آجیغی گلمه دیینه امین ایدیم. بالا هره نین بیر دردی وار دئیه آغلاییب منی جاوابلاندیردی. سونرا باشلادی دانیشماغا :

-         ایللر بویو نذیر نیاز ائله دیم اولاد ایسته دیم ایندی خیرخا اولوب كئچیب بوینوما بیر آجی تیكه اولوب نه آتا بیلیرم نه اودا بیلیرم، اوغلوو آلله بویون یئره سوخسون. ایكی آی اؤنجه آروادین قولاغینا مرثیه اوخوموشدو یولداشیملا بیر ایش باشلاییریق بیزه سرمایا لازیمدیر. دیشیمیزدن دیرناغیمیزدان كسیب بئش یوز مین تومن آرتیرمیشدیم. اونو دا ایرجه سرمایا وئردیم. بیر گون سونرا گؤردوم ایرج بالام باشیما بیر بؤرك كئچیردیب دوز بوغازیما قدر. مندن آلدیغی پولو آپاریب وئریب بیر ایت آلیب دئییر ایتین سیجیللی سی زادی دا وار. نه بیلیم دوكتورو دا وار.  دوكتورونون دئدییینه گؤره گرك ایكی گوندن بیر یویولا. آنداماند ایچمیشم كی ائشیه چخارما یوخسا قوهوم قونشو آراسیندا آبیریمیز گئدر. جانیم بوینوما دی هر نه لازیم اولور اؤزوم آلیب آپاریرام. بیر جوت چكمه بیر جوت ده الجك تاخیب ایرج له حامامدا ایتی یوماغا باشلاییرام. بیر تهر دیله توترام كی ایتی ائشیه چیخارماسین یوخسا جاماحات بارماغینان گؤسترر. آبیرمدان قورخورام نئیله مه لی یم. جاماحاتین منه نه تهر باخدیغینی بیلندن سونرا آلدیغیم شامپولاری وصابونلاری كاپشنین آلتیندا ائوه آپاریردیم كی گؤرن اولماسین. اؤز آرامیزدا قالسین ایته قوللوق ائله دییمی كیمسه بیلمه سین !

حسن مرادی