یاخشیلارلا یولداش اولماق

+0 به یه ن

یاخشیلارلا یولداش اولماق

بیر درویش گزركن آیاقسیز بیر تولكو گؤروب، شاشیردی. «بو حئیوان نه جور یاشاییر، نه یوییر، نه ایچیر؟» دئیرك آللاهین لوطفونه حئیران اولدو. دوشونوركن بیردن بیر شئر ( آسلان ) اورتایا چیخدی، آغزیندا شغال ( چاغال ) وار ایدی. گؤركملی – قورخمالی حئیوان اووونون بیر طرفین یئدی، قالانینی بوراخیب گئتدی. تولكو آرتیغا دوغرو سورونرك یاخینلاشدی. یئییب قارنینی دویوردو. تولكو نون یییه جه یی نین آیاغینا گلدیینی گؤرن درویش اؤز اؤزونه « بیر تولكونون روزوسونو آیاغینا گؤندرن آللاه منیمكین نه دن گؤندرمه سین؟ » دئیرك چالیشماغا مجبور اولمادیغینی، بیر طرفه گئدیب چالیشمادان اوتورا بیله جه یینیی دوشوندو. « آللاه ایسته مه سه گوجلو آسلان دا یئیه جك تاپانماز » دئییب دوشوندویو كیمی ائله دی.

« روزوم آللاهین گؤرونمه ین خزانه سیندن گله جك، چالیشمایا گرك یوخ » دئیرك گؤزله مه یه باشلادی. گؤزله دی ، گؤزله دی .. نه گلن وار نه گئدن ... !

گونلر كئچیب گئتدی. درویش آریقلادی، اریدی بیر دری بیر سوموك اولدو. گوجسوز و اؤلوم حالیندا اولان درویش قالدیغی مچیدین میحرابیندان بیر سس ائشیتدی :« ای تنبل آدام، اؤزونو آیاقسیز بیر تولكویه بنزدرك نه دن یازیق – یازیق اوتورموسان؟ دور آیاغا آسلان كیمی گوجلو اول. باشقاسینین آرتیغینا گؤز تیكمه. سنه یاراشان آرتیق یئمك دئییل، آرتیق بوراخماقدیر. آسلان كیمی گوجلو اولان باشقاسیندان یئیه جك گؤزله مز. تئز دور، چالیش روزونو قازان. اؤزونده یئ مؤحتاجلارا دا یئدیر !»

مریم چرخ انداز

ماهنامه آفتاب آذربایجان

مثنوی دن اولان حیكایه لر



radyo dinle