+0 به یه ن
اؤتن ایللرده چین ولایت ارینین بیرینده بیر قاضی وار ایمیش. اونون شهرتی نه اینكی اولدوغو بؤلگه ده، بلكه باشقا ماحاللارادا گئدیب، چاتمیشدیر. ایستر زنگین اولسون، ایستر یوخسول و ایسترسه بیلیجی و خالق كوتله سی اولسون، اونون میزان تره زیسین و حق – عدالتلی اولدوغونا اینانیردیلار. هامی اونو به یه نیب، اولدوقجا سئویردیلار، آنجاق، پیس عمللی لر و ایری – اویورو آداملار بونو سئومیردیلر.
گونلرین بیرینده قاضی یولدان اؤتوردو، بیردن – بیره یانیقلی اوشاق آغلاماسینی دویدو.
قاضی دایانمادان آتیندان دوشوب، اوشاغا یاخینلاشیب، اوندان سوروشدو:
- اوغلون نه اوچون آغلاییرسان؟
اوشاق آتدان یوخاری قاضینی سوزوب، سونرا باشینا گلن ماجرانی اونا سؤیله دی:
- عمی بیلیرسیز، من آتامی ایتیریب، آنامل یاشاییرام. هر گون آنام تندیره فطیر بیشیریب، من اونلاری ساتیب، خرجیمیزی چیخاریرام. قاباقكیلار كیمی بوگون تئزدن دوروب، فطیرلری ساتدیم. پوللاری توپلاییب، ائوه قاییداندا، گؤردوم یورولموشام، باشیمی آتیب، ائله بورادا یاتدیم. آییلیب، گؤردوم له له وار، یوردو یوخ، بیر نامرد گلیب، بوتون پوللاریمی، اوغورلاییب آپاریب.
قاضی سوروشدو:
- بونون بیر بئله ناراحات لیغی یوخدور كی، اوغلوم.
اوشاق جاواب وئردی:
- عمی بیلیرسیز، بوگون پولوموز یوخدور شام آلماغا.
قاضی بیر آز فیكیره گئده ندن سونرا یئنه سوروشدو:
- اوغلوم دئ گؤروم، بو همان داشدی كی، سبدب پولو ایله بورایا قویموشدون؟
اوشاق اوتقونا – اوتقونا دئدی:
- بلی عمی، ئله بو داشین اوستونده ایدی.
قاضی یانینداكیلارا دئدی:
- بو داشی گؤتورون و منیمله گتیرین. سحر من بو داشی اوغولوغو اوچون محكمه ائده جه یم.
سحریسی گون هامی شهرین مركزینه توپلاندی. خلق، دیلسیز – آغیزسیز بیر داشین نئجه محاكمه اولوناجاغین گؤزله ییردی.
بلی، محكمه قورولدو، قاضی ایسه قضاوت یئرینده ایلشدی. قاضی اوشاقدان بیرده سوروشدو:
- اوغلوم، دئ گؤروم، بو داش همان داشدی كی سنین پولون بو داشین اوستونده اوغورلانیب؟
اوشاق قطعیتله جاواب وئردی:
- بلی آقای قاضی.
قاضی اوجا سسله مأمورلارا امر ائتدی بو عمله گؤره داشا 50 ضربه شاللاق وورسونلار. اونلار داشی وورار – وورماز جاماعتین آراسیندان یوكسلن گولوش دولو سس لر هامینی حیرتلندیردی.
قاضی جاماعاتی ساكت لیگه دعوت ائتدی و دئدی:
- سیزین گولوشونوز، محكمه یه بیر نوع سایقی سیزلیقدیر. هامینیزی بیر نئچه پارا (پول) ایله محكمه ائدیرم.
قاضی امر ائله دی، سو ایله بیر قازان گلدی، اونو گولن آداملارین قاباغینا قویدوكی، پولو قابا سالسینلار. هامی قاضی نین امرینه بویون ایمه لی اولدو.
قاضی اللری قوینوندا، بو صحنه نی تاماشا ائلیردی. هامی پول سالیب قورتاراندا، قاضی مأمورلارا امر ائتدی سونونجو آدامی توتسونلار. قاضی دئییردی:
- اونو توتون، اوشاغین پولونو چالان آدام بودور.
مأمورلار او آدامی توتوب، جیب لرینی آختارماغا باشلادیلار. بئله لیله اوشاغین پوللارینی اوندان آلدیلار.
جاماعات قاضییه دئدی:
- هاردان بیلدین كی، پولو اوغورلایان بو آدامدی؟
قاضی دئدی:
- سو تر – تمیز ایدی، هر كس پوللارینی اونا آتاندا، تمیزلیی قالیردی. آمما بو آدام پوللاری قازانا آتان كیمی سو بولاندی. بللی اولدو داشین اوستونده اولان پوللاری كی، توز – تورپاقلی گؤتورموش. بئله لیكله اصیل اوغرو تاپیلدی.
- جاماعات ایسه اؤز پوللارینی سودان گؤتوردو.
چاپ اولمامیش ناغیللار
بهروز ایمانی – اكبر رحیم زاد فرجی