+0 به یه ن
نبی لر قاچدی من قاچا بیلمیرم
آنام یوردو منیم، گؤز ببگیم دیر
یوردومو گؤزومدن آتا بیلمیرم
بیردن ائل، هاواسی وورور باشیما
سیزلیرام صؤبحه تك یاتا بیلمیرم
بیر یانیم ككره دیر[i]، بیر یانیم بات بات[ii]
چولقانیر بوینوما، دولانیر قات قات
دلی شیطان دئییر اصالتین سات!
هله وار غیرتیم ساتا بیلمیرم
آیریلیق اودونا، یوخومدو دؤزوم
بیر قوش یوخوسونا حسرتدی، گؤزوم
داشی دَلر كئچر كسرلی سؤزوم
ائل آتیب اؤزگه سین دوتا بیلمیرم
یونجادا گؤردوگون، چالاغان چالیر
چالیر چنگه سیله، دیدیر بودالیر
ترلانلار گیزله نیب، باشین دالدالیر
من ده قاناد یوخوم اوچاغ بیلمیرم
ائشیتدیم قورد اؤزون اوبایا ووروب
بؤلوگو، داغیدیب، سورونو قیریب
ایگیدلر، گیزله نیب، چوبان چیغیریب
آغیردی بو سؤزو اوتا بیلمیرم
غیرتیم جوشلانیب، بدنیم اسدی
بایقوشا سؤیله یین، بانلاما، بسدی
« قیریلان زنجیردی، سینان قفسدی»
«سهند»ین سؤزوندن تاپا بیلمیرم
بیر سویا بنزه رم دوشوب چمنه
سیلیب جان وئریر سروه، سمنه
ایستیرم سول تاپام دشته، دمنه
دؤرد یانیم باغلیدی، چیخا بیلمیرم!
سسیمه سس وئرن، اولسا اوجاللام
هندوستان شاهیندان تخت و تاج آللام
سازی دیللندیرسم، یئنه باج آللام
اوندان كی حقیمی، آلا بیلمیرم!
آناما دیمیشدیم اؤلن چاغیندا
یارپاق تك اسمه رم سئل قاباغیندا
گئجه نی كسه رم صؤبح آیاغیندا!
كیم دئییر دوشمنه باتا بیلمیرم!
سینارام، اگیللم ائلیمه گؤره
خارلارام، خارلایان سئلیمه گؤره
باشیم دا كسیلسه دیلیمه گؤره
لال كیمین دایانیب باخا بیلمیرم
بیر آغیز ایستیرم دونیا قَدَری
توصیفه گتیرم نسلِ بشری
یازام، «یارانماییب سیزدن بتری»
شأنیزده سؤز تاپیب یازا بیلمیرم!
«پشتیریم[iii]» چئگنیمده پارپار آینادی
غیرتیم جوشلاندی قانیم قاینادی
آشیق چال سازینی «آغ آت» اوینادی
نبی لر قاچدی من قاچا بیلمیرم!
آغ آتیمین چولو میلَك – میلَك دی
آغ آتین یئریشی دونیادا تك دی
آغ آتیم كیشنه دی، بیلین كی «جكدی»[iv]
آغ آتسیز آرزوما چاتا بیلمیرم!
« جعفری» داغ كیمین چولقانیب غمه
قالانیب نیسگیللی سؤزلر سینه مه
سؤزومو ائشیدن ائدیر همهمه
سؤزو بوندان آرتیق آچا بیلمیرم!
منی آنام دوغوب مردَ مردانا
قهرمان بسله ییب «آذربایجانا»
افتخار یارادام گؤزل «زنگانا»
آی كیمی نوروم وار ساچا بیلمیرم!
هوشنگ جعفری
آغ آتیم ... ایله گونش
[i] ككره؛ آجی بیر اوت آدی.
[ii] بات بات؛ تیكانلی یاپیشقان بیر اوتون آدی.
[iii] پشتیر؛ پنج تیر، توفنگ
[iv] جكدی؛ جنگ دی؛ محاربه دی.