+0 به یه ن
«مهرداد بَی»
دوغوم گونون مبارك
زنگانلی
گوناذتی وی:بوگون 1369 بهمن آیی‌نین 18-ی.[1] قیش دیر. زنگاندا ملّت قیشا اویغون یاشاییرلار. قاپینی اؤرتوب، باجانی تپیب، سس چیخمیر، هیچ كیم‌له گئت- گل یوخ.
بیر اوشاق اولور. آد قویماق تؤره‌نی زنگان دبی كیمی بوتون تورك ملّتیندن آلینان دب اولاراق، یئرینه یئتیریلیر. آد قویولور: «مهرداد».
آد تورك‌لر ایچینده یئنی بیر آد ساییلیر. قاباق‌لار آد قویاندا بایرام، آیدین، یاشار، داداش، آراز یا عربجه دینی آدلار چوخ اولاردی.
ایران-عراق ساواشیندان ایكی ایل‌دن چوخ زامان كئچسه‌ده، هله هردن شهیدلری گلیر. آناآتاسیز، بالاسیز، یارسیز قالان انسان‌لار هله‌ده بو شهرده آغلاییرلار. هله‌ده دنیز اولمایان شهرده، دنیز ظَفَرینی یارادان‌لارین آدلاری یاشاییر. هله‌ده اقتصادی چتینلیك‌لر ملّتی سیخما-بوغمایا سالیر. آما بونلارین هامی‌سی اولاراق «مهرداد» دونیایا گلیر.
هامی اوشاق‌لارا تای. قاش- گؤزو اولاردان قارا دئییل، قانی اولاردان قیرمیزی دئییل. آتاسی كارخانادا ایشلركن، الی گئدیر دستگاها و اوچ بارماغی كسیلیر.
«مهرداد» هامی اوشاق‌لارا تای مكتبده فارسجا اؤیره‌نیر. فارسجا اوخوماغا مجبور قالیر، فارسجا یازماغا مجبور قالیر. رسانه‌لرده تكجه فارسجا ائشیدیب، گؤرمه‌یه مجبور قالیر. بو اؤلكه‌نین هامی اوشاق‌لارینا تای. آذربایجانین بوگونكو بالالارینا تای هر نه‌یه مجبور قالیر، اؤزونه یاساق.
درس‌لری اوخوركن، فارسجانی اؤیره‌نیركن، سوادسیز قالماق ایسته‌میر. ائله بوردا باشقا اوشاق‌لاردان فرقلی اولور. شهرده دورومو دوشونور. مدرسه‌ده تحمیل اولان اؤزگه تاریخ، دیل، ادبیاتیندان اؤز تاریخ، دیل و ادبیاتینا اوز گتیریر. مهرداد بونو دوشونور "مكتبده دئییلن‌لر یانلیش اولا بیلر". دوشونور اؤز دیلی فرقلی دیر.
اورتا اوخول یولداش‌لاری دئییرلر مدرسه‌ده معلم‌لرله تارتیشاردی. اولاردان سورغو سوراردی و جوابسیز قالان سورغولاری اؤزو جوابلاردی. و بو ایش‌لرله كیلاس اوشاق‌لارینی اؤز حاق‌لارینا باشا سالمیشدی.
بو ایش‌لر زنگانین اورتا اوخول‌لاریندا 1380 ایل‌لرینده اوز وئریر. زنگاندا مهردادلار؛ معلّم‌لری، كتاب‌لاری، اوردا وئریلن معلومات‌لاری محاكیمه‌یه آپاریرلار و غلط اولدوق‌لارینی اوزه چیخاریرلار. درس باخیمیندان ان یوخاری سوییه‌ده اولماغی، مهردادی باشقا اؤیرنجی‌لره بیر اؤرنك كیمی تانیتدیریر. اورتا اوخول یولداش‌لاریندان بیری، ایندی بیلیم‌یورددا اوخویور و آذربایجان ملّی حاق‌لاریندان كیلاس‌لاردا سؤز آپاریر، چالیشیر، اؤیره‌نیر و اؤیره‌دیر و بو اویانیشی، بو دوشونجه‌نی مهردادین كیلاس‌لاردا آپاردیغی تارتیشمالارا بورجلودور. اؤزونو تانیییب، حاق‌لارینی بیلیب و اونلارین آلماق گره‌گینی دوشونوب.
مهرداد 1388-ده تبریز بیلیم‌یوردونا آیاق قویور. اوردا درس یانیندا چالیشمالارین داوام ائدیر. "آذربایجان تانیتیم اوجاغی" ایستی بیر اوجاق اولور بالاسینی قوجاقلاماغا. چالیشمالاری دبیر آدیلا داها آرتیقلاشیر. دیل، تاریخ، اسطوره و چئشیتلی قونولاردا كیلاس‌لار داوام ائدیر. آذربایجانین دوننكی اوشاق‌لاری بویون بیلیم‌یورد ایچینده باشقا بیر بیلیم‌یورد یارادیرلار. حاكیم درس، كتاب، اوستادلارا باخمایاراق، اؤزلری هامی‌سین یارادیرلار.
«افشین شهبازی»، «محمد احدی» و سونرالار «روزبه سعادتی» و باشقا آذربایجان اوشاق‌لاری ایندی گنج اولوب‌لار. گنج یاش‌لاریندا كلاس‌لار، اوردولار، كتاب‌لار یارادیرلار. آذربایجاندا یاساقلیغا باخمایاراق اؤیره‌تیم و ائیتیم یولا سالیرلار. و بو زامان یاساقلیق مامورلاری، كئشكچی‌لری دؤزه بیلمیرلر. بونلار یارادان بیلیم‌یوردو آرادان آپارماق آماجیلا، بونلارا یویورورلر.
هامیمیز بیر دوستاقداییق. بو دوستاغی چوخدان دوشونموشدون مهرداد. بیلیردین بونلاری. اوشاقلیق كن باشا دوشموشدون. هر بیر تورك، آنادان اولاندان بونو دوشونور. دوستاقدا اولماغیمیزی هامی‌سی حس ائدیر. آما آزادلیغیمیزین یولودا بوردان كئچیر.
مهرداد، ممد، روزبه، افشین؛ آدلاریز توركجه اولماسادا دوشونجه‌لریز توركجه‌دیر. دئمك ائله آد قویما تؤره‌نیندن سیزلرده، آذربایجان اوشاق‌لاریندا دوشونجه یاراندی. من توركم آما اؤز آدیملا تانینا بیلمه‌رم. هئچ قولاغیمیزا دئییلن اذان سسی‌ده بو یاساقلیغی بیزه یوموشادا بیلمه‌دی و او گوندن اویاندین و اویاتماغی باشلادین.
بو گون 18 بهمن 1390. آذربایجاندا قیش دیر. آما ملّت ایسته‌میر قیشا اویغون یاشاسین: قاپینی آچیر، تپیلمیش باجانی گؤتورور، سس‌سیزلیگی سیندیریر، ایلگی قورور.
بو گون 18 بهمن 1390. اویانیش داوام ائدیر. مهردادلار چوخالیر. زنگاندان تبریزه بیر اویانیش سیمگه‌سی اولور «مهرداد». بَی اولور «مهرداد». 21 یاشی اولور. ایندی دئییلیر: "«مهرداد» بَی دوغوم گونون مبارك".
سن زیندانین اوجا دوواری‌نین دالیندا و چوخ‌لاری دووارین بوتاییندا. بوگون سن دوستاقدا. ملّتین‌ده هله دوستاقدا. شهرداشین «سعید بی متین‌پور»دا دوستاقدا. شهرینده هله سن‌لر یاشاییر. «سید حیدر بایات» دئمه‌لی: سعید اؤزونو زنگانلی بیلیردی و بوگون زنگان، سعیدلی اولوب. سعیدلرله دولوب. سن‌ده اویانیش دامغالاری‌نین بیر ایزی‌سن. باشقا انسان‌لار كیمی، سن ده تكجه بیر انسان كیمی دوغولدون و سنین فرقین بو: انسان اولماغین دوشوندون و انسان یاشاماغین ایسته‌دین. تورك اولماغین دوشوندون. حاق‌لارین دیله‌دین.
آزادلیغین یولو دوستاق‌لاردان كئچیر. بوگون سنین دوغوم گونون تكجه ائویزده یوخ، بوتون اویانمیش ملّتیمیزین اورك‌لرینده یاد اولونور. نییه كی دوغوم گون‌لر بیزیم ملّته اویانیش گون‌لری اولوب. دونن سعید بی متین‌پورون دوغوم گونو، سیاسال دوستاق گونو آدلانیر، صاباح‌لاری «ابراهیم بی رشیدی»نین دوغوم گونو اولاجاق. بیزیم ملّتین آیدین یولو بودور: دوغوم‌لارا فیكیرلشمك و دوغوم‌لاری قوتلو سایماق.
«مهرداد بَی»
دوغوم گونون مبارك
هر گون اوشاق‌لار دوغولور، اویانیش داوام ائدیر، «گله‌جك بیزیم دیر[2]» اوجا سسله‌نیر اوجالارا، «پارچالانمیش آینادان، بیر آیدان مین آی دوغولور، چوخالدیر ایشیغی[3]»...
[1] بو گون «مهرداد كرمی» زنگاندا آنادان اولور. ایندی تبریز بیلیم یوردونون اؤیرنجی سی و انسان حاق‌لاری، اؤیرنجی حركاتی و آذربایجان ملّی حركتی‌نین چالیشقانی‌دیر. 3 دی 1390 (24 ژانویه 2012) تبریزده توتوقلانیب و زنگاندا ساخلانیلیر. 46 گوندور دوستاقدادیر.
[2] آذربایجان اؤیرنجی حركتی‌نین شعاری
[3] «عمران صلاحی» آذربایجانلی یازار و شاعرین شعری