نئچه گون اؤنجه، دولانماق اوچون اورمو شهرینه ساری گئتدیق. ماشیندا یورقون اولاراق یاتمیشدیم، بیردن گؤردوم گؤزلریم آجیشیر. آییلدیم گؤردوم اورمو گؤلونون كؤرپوسونون (بیر نفر دئییردی كؤرپو یوخ، سد) اوستونده گئدیریق. گؤزلریمین آجیشماسی قدیملری منیم یادیما سالدی. نئچه ایل قاباق گئدردیق شربخانا دا سودا چیمردیق. اوندا گؤزوموزه سو گئدنده، ائله بوجور آجیشاردی. ائله بوجور فیكره دالمیشدیم، بیردن كیچیك باجی اوغلوم یادیما توشدی.

اؤز اؤزومه فیكیرلشیردیم او بیر گون بؤیوك بیر بی اولاجاق. اوندا من اونا بئله تعریف ائله­ یه جاغام:

« هن اوغول، بورا بیر زامان بیر گؤزل گؤل ایدی. بیز بورادا چیمردیق و بیرلیقدا گونلر كئچیردردیق».

آمما بیردن فیكریمه یئتیشدی محمد (باجی اوغلوم) بیر گون سوروشسا «دایی بورا نه اوچون قورودی؟»

من نه دئییم؟؟

گؤره سن «محمد» و اونا اوخشار اوشاقلار بیزی باغیشلایاجاقلار؟

یئنه بیر ایل گلیب گئچدی. بو بیر ایل ده منه چوخلو اولای لار توشدو. اوخول یولداشلاریمنان بیری دونیاسینی دئییشدی، یاخین قوهوم لاردان ایكی سی دونیالارین دئییشدیلر و نئچه آجی اولای. آمما اوست - اوسته منه بیر یاخشی ایل اولدو. بو ایل ده من یئنی یولداشلار تاپدیم، بو ایل ده من ایشله ماقا باشلادیم، و بو ایلین سون گونلرینده، اوچونجو دؤنه اولاراق دایی اولدوم!

بو ایلده بو بلاگ دا چوخلو یازیلار یازدیم، چوخلو یولداشلار تاپدیم بورادا، چوخلو بیلگی لر اؤرگندیم بو یولداشلاردان. اولو تانری دان ایسته ییرم بو یئنی ایل منه ، آیله مه و یولداشلاریما بركتلی ایل اولسون. یئنه دئییرم

"یئنی ایلیز قوتلو اولسون"

بوگون بایرام آیینین ایكی سی، دونیا آنا دیلی گونو آدلانیب. بو گون ده نه اولدوغو ایله ایشیم یوخ ( ایسته سز بیلدیركی یازیلاردا یازمیشام ) آمما بوگونده نه ایسته دیقیمیزینان چوخ ایشیم وار. بو گونلر دونیادا باش وئرن چوخلو ساواش لارین توتاماقی (دلیلی)، اینسانی حقلردن گونی گوندن آرتیق ایسته ماق ساییلیر. بیز ده بو گونده اؤز حققیمیزی ایسته ماق اوچون سسله نیریق. بیز یالنیز آنا دیلیمزده یازیب – اوخوماق حققینه عاید اولان بیر قانونون یازیلماسینا چالیشیریق. آمما بیزیم سایقیلی باشچیلاریمیز، بیزی بو حق دن اوزاقا سالیرلار.

توركی دیلینده بیر گؤزل آتا – بابا سؤزی وار كی بئئله دئییر :

« كؤنول قاچانی قووالار ».

بیز ده ایسته دیقیمزی عؤمروموزون سونونا قدر قووالاییب و بیر گون اونا چاتاجیییق. یالنیز بونی گرك بیلماق: « گله جك بیزیمدیر »

یاشاسین آذربایجان

یاشاسین منیم آنا دیلیم

احمد

14 ایل قاباق، بو گونلر، ایلك دؤنه مدرسه یه گئدیردیم. یادیما گلیر چوخلی هیجان واریم ایدی. اوندا سئویردیم گئدیب، یازیب - اوخوماقی اؤرگه نم. كیمسه ده منه دئمیردی سن اؤرگه نن دیل، آنا دیلین دئییل. من چوخ هوشلی اوشاق اولاراق، فارسی دیلین تئز اؤرگندیم، آمما یئنه كیمسه دئمه دی اوّل آنا دیلینی باشار، سونرا گئت اؤزگه دیل باشینا!

دئمك اولار اورتا مكتبه قدر بو سایاق قاباقا گئتدیم. او زامانلار تازا دوشوندوم كی منیم آنا دیلیم، باشاردیقیم دیلدن اوستون و شیرین دیر. بیلیم یوردونا داخیل اولماقدان، آنا دیلیمی اؤرگنماق امكانی دا منه یاراندی! بالا بالا توركجه اوخویوب یازدیم. چوخ سئوینیردیم آنا دیلیمده درسلریمی اوخویام، آمما ... !

سلام لار اولسون عزیز اوخوجولارا !

اول ده نئچه گون اولمادیغیما گؤره من باغیشلامالیسیز ! باشیم بتر قاریشمیشدی !

بیلمیرم نئچه نفرین یادینا گلیر ، یا نئچه نفر بیلیر بو وئبلاگین ایلك یازیسی نه ایدی !

بیر ایل بوندان قاباق ، مرداد آیینین 11-نده من بو وئبلاگی یولا سالدیم . اوندا آرزوبلاگ سروری ده بو گونلره تای گوجلو دییردی ! من بیر اتفاق اوسته آرزوبلاگینان تانیش اولدوم ، اونون توركجه اولماسینا گؤره بیر وئبلاگ آچدیم اوردا ! اوندا منیم بیر باشقا بلاگیم دا وار ایدی ! اوبیرسی بلاگیم فیلتر اولاندان سونرا ، بورادا آرتیق یازماقا باشلادیم ، بورانین اوبیرسی بلاگ لارینان فرقی اوندا اولدی كی ، چالیشدیم بوردا یالنیز توركجه یازام ( حال بو كی اوبیرسی لرده فارسجا دا یازیردیم !). بو یولدا نئچه یولداش منی آلقیشلادیار ، نئچه نفرلر یولوما داش آتدیلار و چوخلاری دانلادیلار منی . آمما من یولما ایمانیم وار ایدی و اونون آردین توتدوم !

بو بیر ایل ده 160 یازی یازمیشام بوردا ( هامیسین اؤزومدن یازمامیشام هااا ! ) تقریباً اولور ایكی گوندن بیر یازی ! چالیشمیشام بو یازیلار چئشیدلی بؤلوم لرده اولسون و اوخوجولاری دردینه دیسین ! بو بلاگین یولوندا نئچه یئنی یولداش تاپمیشام و چوخلو بیلگی لر اله گتیرمیشم ! بو یولداشلامین هامیسین دان دا تشكر ائلیرم !

ایندی سیزدن ایسته ییرم منیم بو یولدا گئتماقیما بلدچی اولاسیز و منی بو یولدا یالنیز بوراخمایاسیز ! ایسته ییرم گؤروش لریزینن منه اؤیرده سیز !

سیزی سئویرم

یاشاسین آذربایجان ، یاشاسین منیم دیلیم

احمد تبریزلی