هر بیر اینسان چیخارینا گؤره اؤزونه یاراشان آد قازاناردی ،بئله لیكله گؤرونور كی هر كیمین آدی اونون شخصیتین گؤرسدن دیر . تورك لر ایلك هم ده قارشیلیق سیز ایسلام دینینی قبول ائدنلردن اولدوقلاری اوچون بوتون اؤز عادت - عنعنه لرینه ایسلامی اینانجلارا قاتاراق اونلاری یاشاتمیشلار .

هر میللتین وارلیغی ، تاریخی ، عادت - عنعنه لرینی یالنیز آدلارلا تانیماق اولا بیلر . بونلاردا آد قونوسو اجتماعی ، سیاسی یاشاییشادا اولاركن اؤز اؤنمینی ادبیات ، مدنیت باشقا ساحه لرده قورویوب ساخلاییر.

اسكی تورك لر اوشاق لارینا آد قویماغی چوخ اؤنملی سایاردیلار . اوشاغین آدی ایله ائلین یازیسی آراسیندا بیر باغلیلیق اولدوغونا ، سانكی اوشاغین آدی اونون روحو كیمی بیر شئی ساییلدیغینا اینانیلاردی . آد قویمایا اسكی تورك لرده تؤره‌ن توتولاردی . هر اوشاغین دونیایا گؤز آچماسی او عائیله یه ، سونسوز سئوینج باغیشلار . بو سئوینجله باغلی اولان بیر سیرا عادت - عنعنه لریمیز اولاردی بو مراسیملردن بیر پارا سینین ایزلری ایندی ده گؤزه دیمك ده دیر . اونلارین بیری اوشاغین ایكی آدلیلیغی دیر . اسكی توركلرین ایناملارینا گؤره اوشاغی ، كیچیك یاشلاریندا عائله وریندن بیر آد وئریلیب سونرالار بویا - باشا چاتدیغیندا آد قازانیلمالی ایدی .

هر بیر اینسان چیخارینا گؤره اؤزونه یاراشان آد قازاناردی ، بئله لیكله گؤرونور كی هر كیمین آدی اونون شخصیتین گؤرسدن دیر .  تورك لر ایلك هم ده قارشیلیق سیز ایسلام دینینی ایلك قبول ائدنلردن اولدوقلاری اوچون بوتون اؤز عادت - عنعنه لرینه ایسلامی اینانجلارا قاتاراق اونلاری یاشاتمیشلار. آذربایجان اؤزللیك له تبریز شهرینده بئله بیر رسم واردیر كی بوتون اوغلان اوشاقلاری نین آدی محمد ، قیز اوشاقلاری نین آدی فاطیمه قویولار سونرا عائله وریندن گؤزل - یاراشیقلی بیر آد سئچیلر . آد قویما دبی قدیم چوخ طنطنه لی - رسمی كئچیریلردی . اوشاق اولدوقدان سونرا 10- اونجو گون طایفانین بویوكلری قوناق چاغریلیب آد قویما توتولاردی . بوتون قوناقلار بیر آرایا ییغیشدیقدان سونرا اوشاغی آناسی ، ائوین ، ائلین آغ ساققال یا آغ بیرچیی نین قوجاغینا وئریب اودا اوشاغین ساغ قولاغینا اذان ، سول قولاغینادا ایقامه اوخویوب آدین قولاغینا دئیردی . آدین سئچیلمه سینده ده بیر پارا رسمیلر واریدی . بیرینجی بوكی چالیشلاردی آدلار گؤزل هم ده آنلاملی سئچیلسینلر . تكجه اوشاغین كیچیكلی یی گؤز اؤنونه آلینمازدی . ایكینجی سی عائیله نین بؤیوكلرینین آدلارینی یاشاتماغا اوشاغین بؤیوك آتاسی یا اوشاغین بؤیوك آناسی نین آدی سئچیلردی . بئله لیكله چالیشیلاردی بؤیوكلرین آدلاری همه شه دیری قالسین . بو آد قوروماق رسمینی ائوین ،عائیله نین كیچیك اوغلو اؤز اوشاغینا قویمالیدی . اگر بیر ائوده بؤیوك ائولاد ایسته سه یدی اوشاغینا بؤیوك آتا یا بؤیوك آناسی نین آدین قویسون گرك كیچیك قارداشینا پای آلیب اوندان آدی آلایدی.

اوشاغین آدی قورآندان یا دوغولدوغو گونه باغلی سئچیرلردی . اوشاغین آدی اوغلان طایفاسی وریندن وئریلیب ، قیز عائله سی چوخ آز ، آد قویمالارا قاتیلاردیلار.

اوشاغین قولاقلارینا اذان - ایقامه اوخودوقدان سونرا اوشاغین آدین دئییب دئیردیلر : آدین من وئردیم ،یاشین تاری وئرسین . سونرا ساغ طرفدن قوناقلار بیر - بیر اوشاغی قوجاقلارینا آلیب دئیردیلر : ال اوشاغی ، وئر اوشاغی ، تاری ساخلاسین بو اوشاغی یا آتالی - آنالی اولاسان ، آللاه الیزده - اووجوزدا ساخلاسین .

ائلین آغ بیرچكلری ، اوشاغی قوجاقلارینا آلیب اوزوندن اؤپوب آدین دئییب دئیردیلر : كؤرپه نی وئر بیرمنه اؤپوم اونو دویونجا ؛ آرزیم بودورهمه شه ؛ یاشایاسان آدینجا  .

ان سون اوشاق آناسینا چاتاندا هامی اوشاغین آدین اونا تبریك دئییب ؛ آتالی - آنالی اولوب روزوسو بول اولماسین دئیردیلر . اوشاغی گؤزدن قورماق اوچون آد قویولدوقدان سونرا بؤركونه یا پالتارینا گؤزمینجیغی یا پنجه الا بیر( پنج تن آل عبا ) یازیلی قیزل یا گوموش پلاك سانجاردیلار . قوناقلار شنلیك ائدیب یئمك وئریلردی سونرا قوناقلار هره سی بیر آلقیش دئییب اوشاغا اوزون عؤمورلر دیلردیلر . بو آلقیشلار بوجوردو : آدی ایله بویوسون ، بویوك اوغلان یا قیز اولاسان ، گون او گون اولسون تویوندا سوزه - سوزه اویناییم  .

هر عائله دوشونجه - اینانجلارینا گؤره اوشاغینا آد سئچر . چوخ آدام اوشاغینا ایگید بابالاری نین ، ائل قهرمانلاری نین یا یوردونون آدلیم كیشی لری نین آدین سئچیب قویاردیلار .