+0 به یه ن
آذربایجان ائلینین فولكوروندا ، جوره – جوره اویونلار وار. بو اویونلارین نئچه سی اوشاقلاردان سوبای ، بؤیوك لرده اویناردیلار . بونلاردان بیری « هاقیشقا » اویونودور . من اؤزوم قدیم لر « قدس » مدرسه سینده بو اویونو اویناردیم ، چوخ گؤزل اویوندو . بو اوینا بیز « ناققیشلی » دا دئیردیق !
بو اویونون وصفینده بئله گلیپ :
اویونچولار ایكی دسته یه بؤلونرلر. بیر محدوده تعیین ائدیلیب دسته لرین بیری ایچری گیرر و او بیریسی ائشیكده قالار. ائشیكده كیرلرین بیری ، بیر قیچین ییغار و تك قیچلی آتلانا – آتلانا ( هاقیشقا ) ایچریده كیلری قاوالایار و جهد ائدر اونلاری وورسون . هر هانسینا الی ده یرسه، او گرك اویوندان چیخا. ایچریده كیلرین بیری محدوده دن ائشییه چیخارسا ، یانیب و اویندان چیخار. هاقیشقا گئدن یورولانا كیمی ایچریده كیلری قاوالاییب و ووماغا چالیشاجاق. ائله كی دوشدو ( آیاغین یئره قویدو ) یولداشلاری نین بیر آیریسی هاقیشقا گلر و اویون بئله لیكله ادامه تاپار. ایچریده كیلرین هامیسی وورولسا، بو دفعه ائشیكده كی دسته ایچری گیرر و اوبیرسی دسته ائشیكده قالار. یوخ، حتی بیر نفر ده ایچریده كیلردن جان قورتاریب وورولمازسا و ائشیكده كیلرین هامیسی دوشرسه، یئنه همان دسته ایچریده قالار و اویون یئنی دن باشلانار.