+0 به یه ن
آذربایجان خالقینین گؤزل دب لریندن بیری ، توی دب لری دی . دوزدی آذربایجانین چئشیدلی یئرلرینده ، آیری – آیری دب لر وار ، آمما چوخو دا بیر دی . من بوردا چالیشمیشام توی دب لریندن نئچه سینی گتیرم . سیزین ده بونلارا گؤره بیلگی اولسا ، سئوینرم منه وئره سیز .
توی مراسیمی
ایندی لیكده توی مراسیمی اوغلان ائوی نین مادی وضعیتی و موقعیتینه گؤره چئشیدلی ( مختلف ) طرزلرده كئچیریلیر . توی خرجینه گوجو چاتمایانلار ، یالنیز بیر گونده قیزا شیرنی ایچر ، كبین كسدیرر و نئچه گون سونرا اوغلان لا قیز ایكیسی مشهد مسافرتینه گئدر و اورادان بیر باشا اوغلان ائوینه قاییدارلار . من بورادا قدیمدن قالان توی مراسیمینین عنعه لرینی قئیده آلمیشام ، ایندی بو رسملر بیرآز دییشیلیب لرسه ده یئنه ائلیمیزین بزه یی دیلر .
قند سینما گئجه سی
ائله كی ائلچی لر قیز ائوی ایله یوللاشیب توافقه یئتیشدیلر ، اوغلانلا قیزی كوچه ده یا بیر قوهومون – تانیشین ائوینده بیر – بیرلرینه گؤستررلر. بیر – بیرلرینی بیه نرسه لر ، قند سینما گئجه سی تعیین اولونار. اؤنجه دن كبین و باشلیغین مبلغی ، ایكی عایله نین قوهوم بؤیوكلرینین مصلحتی ایله اوغلان و قیزین آتالاری آراسیندا تعیین اولونار . بعضاً ده قند سینما گئجه سینده اوزون بیر دانیشیقدا سونرا كبین باشلیغی بیر مبلغه كسرلر . قند سینما گئجه سی قیز ائوینده اولار . اوغلان ائوی ایكی كلله قند ، قئیچی ، داراق و ... اؤنجه دن قیز ائوینه گؤنده رر. ایكی طرفین یاخین قوهوم و تانیش لارینی قیز ائوینه چاغیرارلار. بعضی عایله لر قیزین قندینی سیندیرار ، كبین كسمه نی سونرایا ساخلایارلار. بو گئجه ف ملا اوغلان و قیزین بلی جوابینی آلدیقدا ، قئیچی نی دیزینی یا دؤشكچه نین آلتینا قویار و كبین كسر . اوغلان ائوینین حؤرمتلی بؤیوكلریندن ، ایكی كلله قندی بیر – بیرینه وورار و سیندیرار . گوجو چاتمازسا ، قند كركیسی ایله سیندیرار . قندین باشینی بیر نفر اوغلان آدامی گؤتورر كی اونون یئرینه دیرلی بیر خلعت قویاجاقی گركلی دیر . سینمیش قندلری قیز اولان اوتاقا كی ایكی طرفین آروادلاری ییغیشیبلار آپارار ، قیزین باشی اوسته بیر پارچا آچیب اونون اوستونده اووارلار . كبین كسیلمه دن تكجه قند سینارسا ، بو گئجه نین صاباحیسی هر یئرده دئیرلر فیلان كسین قیزی نین قندی فیلان اوغلانا سینیبدیر .