+0 به یه ن
توی مراسیم لرینه باغلی اولان ایكی باشقا دبی بو یازیدا قوللوغوزا تقدیم ائدیرم. سئوینرم باخیش لاریزی اوخویام !
اوزوك تاخما
قدیم لر اوغلان و قیز ائوی نین توافقی اوزره آپاریب قیزا اوزوك تاخار و اونو اوغلانا نیشانلایاردیلار. آداخلی ( نیشانلی ) قیزی باشقاسینا وئرمه یه حق لری یوخ ایدی. اییرمی – اوتوز ایل بوندان قاباق اوزوك تاخمانین بیر رسمی بئله ایدی كی كبین كسیلندن سونرا، قیز بارماغینین اؤلچوسونو اوغلان طرفینه گتیرمكله، اوغلان ائوی قیزیل حلقه یا اوندان باهالیسین آلاردی. بیر گون اوغلان بیر دسته گول توتوب ایلك دفعه اولاراق آناسی یلا قیز ائوینه گئدردی. بیر آز صحبت و چای شیرنی دن سونرا، اوغلان قیزین بارماغینا حلقه تاخاردی. یا اوغلانین آناسی قاییدار، قیز و اوغلانی اوطاقدا تك قویار و اوغلان قیزین بارماغینا حلقه تاخاردی. سونرا قیز ائوی ده اوغلانا حلقه آلاردی. ایندیلر ایسه كبین كسیلندن سونرا اوغلان و قیز آنالاری یلا بیرلیكده زرگر دوكانینا گئدر و حلقه گؤتوررلر. اوغلانین حلقه پولونو قیز، و قیزین حلقه پولونو اوغلان وئرر.
شیرنی ایچمه گونو
قیزا بازاردان پارچا گؤتورر، آینا، شمعدان، كیف، باشماق، گلین پالتاری، قیزیل و... قالیب اوغلان ائوینین مادی وضعیتینه دا. قیزین یاخین قوهوملارینا خلعت، قنادی سیرنی سی و میوه، نئچه خونچایا قویوب، قیز ائوینه گؤندررلر. اوغلان و قیز ائوینین بوتون قوهوم – قونشو و تانیشلارینی شیرنیه چاغیرارلار. شیرنی ایچمه مراسیمی قیز ائوینده اولار. مراسیمدن سونرا، اوغلانی قیزین یانینا آپارارلار. نئچه ایل لردن بری كیشی لری ده قیز ائوینه شیرنی یه چاغیریرلار. مثلاً كیشی لر قیز ائوینین اؤزونده و آروادلار قیز ائوینین اركی یئتن قونشولاری نین بیریسینده ییغیشارلار. هردن كبین كسمه نی ده بوگونه سالارلار. اوغلان كیشی لرین مجلیسینده اولار. اوغلانین باجی سی اونو چكه- چكه آروادلارین ایچینه آپارار. قدیم لر تویا یاخین، قیز ائوینه مخصوص بیر دب ده وار ایدی كی دئیردیلر فلانكسین قیزینین ـ آستا كؤبه سی » دیر.