بیر ایل ده قورتولماقدا دی. بایراما قاخینلاشدیقجا، آذربایجانین اسكی دب لری یادیما توشر. بو گؤزل دب لردن بیری «ایلین آخیر چرشنبه سی» دبی ساییلیر. بو گونون اؤنملی عنعه لریندن نئچه سینی بیر یازیدا «فولكلور خزانه سی» كیتابیندان سیز اوچون حاضیرلامیشام. بیر یازی دا بیلدیر چرشنبه آخشامی یازمیشدیم. سئوسز اونا دا باش وورون.

" ایلین آخیر چرشنبه سی نین قاباقكی گونو، بیر عنعه اولاراق، سحر كندلی بازار اولاردی. كندلی لر گلیب آینا، داراق، عطیر، كاغیذگول، كوزه، یئدی له وین و ... آلیب كنده قاییداردیلار. ناهاردان سونرا ایسه، شهرلی لر بازارا چیخیب چرشنبه لیك آلاردیلار. ایلین آخیر چرشنبه سینه آچیلان گئجه، اول آخشام، «اجیزه» دن دوزلمیش «قاروره» یا باریت دان دوزلمیش «قفتاراققا»، «تومانا گیرن»، «جین كوزه سی»، بانكی (فیشیلدایا - فیشیلدایا گؤیه گئدردی) و ... شئی لر آتار، اود یاندیرار و اوستوندن آتلاناردیلار.

اودون كولونو، كوچه قاپیسی نین ائشییی، ایكی طرفینده دیوارین دیبینه تؤكردیلر. بندر باشیندا، آیاق آلتینا كلید سالار، دایانیب یولدان كئچنلرین سؤزلرینه یا قاپی دالیندان اوطاقداكی لارین صحبتینه قولاق آساردیلار. كندلرده شال ساللاماق رسمی یئنه دوروردو. چرشنبه گونو سحر تئزدن «آبارا اوستو»نه گئدر، مخصوصاً ارلیك قیزلار بختیم آچیلسین دئیه «نوو»دان ( دییرمان آرخی نین نوودان تؤكوله جك یئریندن) آتلاناردیلار. "

بیلدیركی یازی:

http://www.ahmadgk.arzublog.com/post-%DA%86%D8%B1%D8%B4%D9%86%D8%A8%D9%87+%D8%B3%D9%88%D8%B1%D9%8A-12935.html