Mən şair deyiləm bağışla məni,
Sevgilim yazıram qəlbim deyəni.
Ürəklə deyirəm bu dörd kəlməni,
Əbədi olaraq sevirəm səni.

من شاعر دئییلم باغیشلا منی

سئوگیلیم یازیرام قلبیم دئینی

اوركله دئییرم بو دؤرد كلمه نی

ابدی اولاراق سئویرم سنی

آذربایجان فولكولوروندا جوره – جوره اویونلار اولاراق ، بو اویونلارین نئچه سی مجلس قیزیشدیران اویونلار آدلانیر . بو اویونلار قوناق اولان یئرلرده یوخسا یولداشلار بیر یئره ییغیشاندا اوینانارمیش . بو اویونلاردان بیری " نلبكی " اویونی دی . بو یازی دا " نلبكی " اویونونو سیزه اؤیرتماق ایسته ییرم !

بیر نفر اوزونو مجلس اهلینه توتوب دئییر : سیزین بیر نفری نیز حاضیر اولارسا ، من باشارا بیلرم ایكی نلبكی ، بیرین او ، بیرین من الیمیزه گؤتورك و هره میز بیر یاندا دوراق . او آدام ، بیر سكه نی نلبكی نین ایچینده كی سویا سالسین ، من ال وورمادان ، هامی نین گؤزو باخا – باخا او پولو اؤز نلبكیمه گتیریم . طبیعی ، هامی بو سؤزه ماراقلانیب و بیر نفر بو ایشه حاضیر اولاجاق . ایكی نلبكی گتیرر . هره سینین ایچینه بیر آز سو تؤكر و اونلارین الینه وئررلر . او آدام اؤز الی ایله پولو نلبكی نین ایچینه سالار . اویونچو دئیر : من نه حركت ائدرسم ، گرك سنده عین حركتی تكرار ائده سن و گؤزلرین منیم گؤزلریمه باخا . گؤزلرینی یاییندیریب آیری یانا باخارسان ، او پول منیم نلبكیمه گلمز . بو شرطی كسندن سونرا الین نلبكی نین سویونا وورار . چكر نلبكی نین آلتینا و سونرا اوزونه چكر . او آدامدا بو حركتی تكرار ائدر . آمما اونون نلبكی سی نین آلتینا اؤنجه دن كؤمور قره سی یا بیر باشقا قره رنگ سورتوبلر . او آدام اؤزو بیلمه دن او قره نی اوزونه یاخار و مجلس اهلی نین گولمه یینه سبب اولار . او بوجور الینی بورنونا ، آلینی نا و اوزونون جئشیدلی یئرلرینه چكر ، اوزو آلا – بولا اولار و مجلس اهلی گولمكدن قیریلار .

بو گونلر " فریدون احمدیان " جنابلارینین یئنی آلبومی بازارا گلیب . بو آلبوم " محبت سون سوز دور " آدلانیب و 10 ماهنی سی وار .

بو یازی دا بو آلبومون بیرینجی ماهنی سین سیز اوچون قویموشام . بو ماهنی نین آدی " بیر نی كیمی هردم " دی . اومورام بو آلبومو آلماقینان ، بو گئنج اوخوجوموزا یاردیم اولاسیز .

DOWNLOAD

آذربایجانین دوچرخه سواری تورو آغلار – گولر آیینین 23 – دن ، 28 – نه قدر دوغو و باتی آذربایجان و اردبیل استانلاریندا كئچیریله جك . كئچن آی تورون بینؤره سین قویان « اكبر گهرخانی » جنابلاری دونیاسینی دئییشدی و بو ایل بو تور بو كیشینی داها گؤرمه یه جك . بو توردا 15 خارجی تیم و 6 ایرانلی تیم آیاق ویراجاقلار . بو تیملردن توركیه نین " برسیا اسپور " و " شكر اسپور تیملری ایتالیانین " MICHE – GUERCIOTTI " و " AMORE & VITA " تیملری و استرالیا ، گونئی آفریقا ، ژاپن ، مالزی ، قزاقستان ، بئلژیك ، آلمان و هنگ كنگ ایله سوییس دن بیرلشمیش تیملر واردیلار . بیرده اوزبكستان و قزاقیستانین میللی تیملری ده واردیلار .

همی ده تبریزین " پتروشیمی " و " سورن " تیملری ، اردبیلین " پانا " تیمی ، اورمونون " جوانان خیر " تیمی ، كرمانین " ولی عصر " تیمی و " دانشگاه آزاد " تیملری ده ایراندان بو تور دا واردیلار .

اوشاخلارا توركی دیل اؤیرتماق اوچون ، اونلارا توركجه ناغیل دئماق ، چوخ اؤنملی ایش ساییلیر . « خوخان » آدلی نئچه توركجه یازیلمیش ناغیل ، اینترنت دونیاسیندا یاییلماق حالیندادیر . من « آفتاب آذربایجان » درگی سیندن بو توپلاما ایله تانیش اولدوم . بورادا بو توپلو دان بیر ناغیل یازیرام . سیزده www.xoxan.com سایتینا باش وورساز بو گؤزل ناغیل لاردان اوخویا بیلرسیز . كیچیك اوشاقلاری اولانلار و كیچیك باجی – قارداشلاری اولانلار حتما باش ووروب اوشاقلاری بو ناغیل لاری تعریف ائله سینلر .

آنا خوخان قوناق گئدیب. من له آتا خوخان اؤزوموزه ناهار پیشیریریك.سحرآنام گئدنده تاپشیریب آتادان گؤز اولام. من ده گؤز اولورام داا. آتا خوخان یئرآلما سویور. دئیرم:« وئر من سویوم!» دئیر:«پیچاق الینه دوشر.» محبتله اوزونه باخیرام بلكه نظری ده‌ییشدی. گولوب دئییر :«یــــــوخ» یادیما دوشور آنام یئر آلمالاری او یئكه قیرمیزی تاوایا تؤكر قاچیرام اونو تاپام. آتام دئییر:«هـــه سن اؤزونه اویناسان هرزاددان یاخشیدیر» من كابینتلری آختاریرام. او یئكه قیرمیز تاوا هاردادیر بس آخی؟! آتام اوتاقدان منه شعر اوخویور:«بالاجا قیزیم دو چای قوی...ائوی سوپور ناهار قوی! »

گؤیلومی ایسته سه هر كیمسه هراسان اولسون

اودا من تك گؤروم آخیرده پریشان اولسون

مین گؤیول حسرت نان ایله پریشان اولسا

قویمارام دلبریمین زولفی پریشان اولسون

هر كیم ایستیر وطنیندن قاچا دیوانه كیمین

تا اؤلونجه قالا غربت ده ، مسلمان اولسون

مومن كامل ایدیم بنده فراوانلیقدا

كافر اولدوم ، بو گرك كی باهالیقدان اولسون

ایندی بیر ایلده چكدیگی زحمتی هئچ اولان اكینچی نین دویغوسوندایام !

بوگون بیر ایللیك زحمتیمیز هئچه گئتدی . تیراختور آسیادان قالدی ! بولورم گینه آسیا اویونلارینا چاتماقا اومود وار ، آمما دیله ییرم گئتمیاق آسیایا !

 گئداق آسیادا " مسعود ابراهیم زاده " بوش قولی وورسون ائشییه ؟

گئداق آسیادا " علی علیزاده " هرنه توپ یئتیشیر ، وئرسین رقیبه ؟

گئداق آسیا دا " محمد نصرتی " بارا وئرسین ؟

گئداق آسیا دا " فراز كمالوند " اؤز یانلیش لاری ایله اویونو اودوزماقا باعیث اولسون ؟

گئداق آسیا دا " كرار جاسم محمد " – ین ییخیلیب پئنالتی آلماسینا اومود باغلیاق ؟

گئداق آسیادا 100 مین نفر تاماشاچی گلسین استادیوما ، آمما تكجه 500 نفری تیراختوری آلقیشلاسین ؟

گئداق آسیا دا اودوزاق ، تاماشیچیلار صندل لری سیندیرسینلار ؟

گئداق آسیا دا اویوندان چیخاندان سونرا ، " یگان ویژه " داشینان میللتی وورسون ؟

هئچ ایسته میرم گئداق !

آسیا من گلمیرم !

هادی سن ساغ ، من سلامت !

توركی دیلینده حئیوان آدلاری چوخ چئشیدلی اولاراق ، گاهدان اونلارین اركك لری ایله دیشی لرینین آدلاری فرقلی اولور . بو یازیدا اونلارین نئچه سینین یازمیشام .

سیزده بونلاری اوخویاندان سونرا بویرون سیزین ماهال دا بو حئیوانلار نه آدلانارلار ؟

بونلاردان باشقا آد دا بیلسز حتما باخیش لار بؤلومونده یازین ، من ده بو لیسته آرتیرارام !